Zelenskiy Fransiyadan jangovar samolyotlarni olib kelmoqchi 

Ukraina Prezidenti Vladimir Zelenskiy bugun, 17 noyabr kuni Parijga tashrifi chog‘ida Fransiya bilan havo mudofaa tizimlari, jangovar samolyotlar va raketalarni yetkazib berish bo‘yicha muhim kelishuvlar tuzishi kutilmoqda. Bu haqda “Reuters” xabar berdi.

“Fransiya bilan tarixiy kelishuv tayyorlandi – biz jangovar aviatsiyamizni, havo mudofaa kuchlarimizni va boshqa mudofaa salohiyatimizni sezilarli darajada mustahkamlaymiz. Bitim dushanba kuni imzolanishi rejalashtirilgan”, deb yozgan Zelenskiy X (sobiq Twitter)dagi sahifasida.

Ma’lumotlarga ko‘ra, Fransiya Zelenskiyga bir nechta SAMP/T havo mudofaa tizimlari va Aster-30 turidagi yer‑havo raketalarini taklif qilishi mumkin. Shu bilan birga, 10 yillik strategik aviatsiya kelishuvi ham muhokama qilinadi, jumladan, Dassault Rafale samolyotlarini yetkazib berish rejalashtirilgan.

Keltirilishicha, ba’zi samolyotlar Fransiyaning hozirgi zaxiralaridan olinadi, qolganlari esa Ukraina uzoq muddatli jangovar aviatsiya parkini kengaytirish rejasiga kiritiladi. Zelenskiy ilgari Ukraina 250 ta jangovar samolyotga ega flot yaratishni maqsad qilganini bildirgan, shu jumladan, AQSHning F‑16 va Shvetsiyaning Gripen samolyotlari ham nazarda tutilgan.

Yangi samolyotlarni ishlatish uchun Ukraina uchuvchilari maxsus tayyorgarlikdan o‘tishi zarur bo‘ladi.

Tashrif davomida SAMP/T tizimlarini kengaytirish bo‘yicha yangi bitimlar ham tuzilishi kutilmoqda – ba’zilari mavjud zaxiralardan, boshqalari uzoq muddatli buyurtmalar orqali amalga oshiriladi. Shu bilan birga, Ukraina va Fransiyaning dron texnologiyalari bo‘yicha ham hamkorligi kengayishi rejalashtirilgan.

Eslatib o‘tamiz, avvalroq Ukraina Prezidenti Vladimir Zelenskiy mamlakat hamkor davlatlar bilan birgalikda qo‘shimcha Amerikaning Patriot zenit-raketa tizimlarini xarid qilish ustida ish olib borayotganini ma’lum qilgandi.

Qobilova Komila