Zelenskiy asirga olingan Shimoliy Koreya askarlari halok bo‘lganini aytdi

Moskva tomonida Rossiyaning Ukrainaga qarshi urushida qatnashgan va Ukraina Maxsus operatsiya qo‘shinlari tomonidan asirga olingan Shimoliy Koreya askarlarining barchasi olgan jarohatlari tufayli vafot etdi. Bu haqda Ukraina Prezidenti Vladimir Zelenskiy joriy yilning 27 dekabr kuni kechqurun o‘z videomurojaatida ma’lum qildi. 

“Bugun odamlarimiz Shimoliy Koreyaning bir necha askarini qo‘lga olishga muvaffaq bo‘lgan, ammo ular juda og‘ir yaralangan hamda ularni jonlantirish imkoni bo‘lmagan”, deydi Ukraina Prezidenti.

Zelenskiyning so‘zlariga ko‘ra, Rossiya tomonidan Kursk viloyatiga joylashtirilgan Shimoliy Koreya askarlari ko‘p yo‘qotishlarga ega. Shu bilan birga, Rossiya harbiylari va Shimoliy Koreya gvardiyasi KXDRning asirga tushgan askarlarining omon qolishidan umuman manfaatdor emas.

“Shimoliy koreyaliklarning qo‘lga tushishiga yo‘l qo‘ymaslik uchun ularni o‘z xalqi yo‘q qilmoqda, bunday faktlar bor”, deb ta’kidlaydi Zelenskiy.

Bundan oldin Ukraina Maxsus operatsiya qo‘shinlari Rossiya tomonida jang qilgan birinchi Shimoliy Koreya askarini qo‘lga olgandi. Seuldagi AFP manbasiga ko‘ra, Janubiy Koreya razvedkasi harbiy shaxsning aynan qayerda qo‘lga olingani haqida hozircha ma’lumotga ega emas. Ukrainaga qarashli “Militarny” nashrining yozishiga qaraganda asirga olish Kursk viloyatida sodir bo‘lgan. Bundan oldin Ukraina Qurolli kuchlari askarlariga hujjatlar bilan kamida bitta Shimoliy Koreya askarini qo‘lga olish buyrug‘i berilgan edi. Buning uchun harbiylarga mukofotlar, jumladan, qo‘shimcha ta’til va’da qilingan.

Eslatib o‘tamiz, avvalroq Ukraina Prezidenti Vladimir Zelenskiy Rossiya askarlari o‘lgan shimoliy koreyaliklarning yuzlarini yoqib yuborayotganini aytgan edi. U koreyaliklarning Rossiya rahbari Vladimir Putin uchun jang qilishi va o‘lishiga hech qanday sabab yo‘qligini ta’kidlab, o‘limdan keyin ham ular hech narsaga erishmasligini eslatdi. Zelenskiy halok bo‘lgan KXDR askarlarining yoqib yuborilishini “Rossiyada hukm surayotgan hurmatsizlik, insoniylikka, hamma narsaga hurmatsizlik namoyishi” deb atagandi.