Zelenskaya dunyoning eng nufuzli 100 odami ro‘yxatiga kiritildi

Ukraina Prezidenti Vladimir Zelenskiyning rafiqasi Olena Zelenskaya “Time” nashri versiyasiga ko‘ra, dunyoning eng nufuzli 100 nafar odami ro‘yxatiga kiritildi.

Qayd etilishicha, Vladimir Zelenskiyning rafiqasi Olena Zelenskaya AQSHning birinchi xonimi Jill Bayden tomonidan alohida e’tirof etilgan. 

Bayden xonim uni ikki farzandning onasi va sahna ortida ishlovchi yozuvchi deya ta’riflagan. 

“Men birinchi xonimni o‘tgan onalar kunida o‘z mamlakati chekkasidagi kichik shaharchada, Rossiyaning asossiz bosqinchilik urushi boshlanganidan bir necha oy o‘tgach uchratdim. Biz beixtiyor ravishda quchoqlashdik – ikki ona, ikki xalq tinchlik uchun birlashdi. Uning tabassumida men u ko‘targan og‘irlikni ko‘rdim: tushayotgan bombalar zarbasi ostida yo‘qolgan uyqu, u hech qachon unutmaydigan vahshiylik haqidagi ertaklar. Biroq uning nazarida o‘z xalqini ifodalovchi shiddatli qat’iyat va qadr-qimmat bor edi. U oilasini olib qochib ketishi mumkin edi. Qaysi ona uni ayblaydi? Shunga qaramay, u qoldi. U qoldi, chunki erkinlik va demokratiya himoyachilarga loyiqdir. U dunyoga yurak va umid hatto eng katta zolimni ham ojiz qilib qo‘yishi mumkinligini ko‘rsatish uchun qoldi. U o‘z farzandlari uchun – ularning va barcha ukrainaliklarning kelajagi uchun qoldi. Olena Zelenskaya – ona, himoyachi. O‘z millatining faxri. U sevgan odamlar uchun umid chirog‘i”, deya ta’riflaydi Jill Bayden. 

Yuztalik ro‘yxatdan, shuningdek, giyohvand modda bilan qo‘lga olinib, Rossiyada 10 oy qamoqda saqlangan va o‘tgan yili dekabr oyida mahbuslar almashinuvi natijasida yurtiga qaytgan amerikalik basketbolchi Brittni Grayner ham o‘rin olgan. Shuningdek, josuslikda ayblanib, qamalgan "Wall Street Journal” muxbiri Evan Greshkovich ham qayd etilgan. 

Shunindgek, ro‘yxatdan “PSJ” futbol klubi hujumchisi Killian Mbappe, o‘tgan yili Twitter'ni sotib olgan va uzoq vaqt dunyoning eng boy odami bo‘lib kelgan Ilon Mask, futbol bo‘yicha 2022 yilgi Jahon chempionatida g‘olib chiqqan Lionel Messi, Germaniya Kansleri Olaf Shols, AQSH Prezidenti Jo Bayden, Buyuk Britaniya qiroli Charlz III, Braziliya Prezidenti Luis Inatsiu Lula da Silva, o‘zining “Shayton suralari” asari bilan mashhur bo‘lgan va o‘tgan yili suiqasdga uchrab, bir ko‘zidan ayrilgan Salmon Rushdiy singari shaxslar kiritilgan.