Yong‘indan jabr ko‘rganlarga 56 mln so‘mgacha yordam beriladi

O‘zbekistonda endilikda yong‘in, suv toshqini, zilzila va boshqa texnogen hodisalar oqibatida zarar ko‘rgan Kambag‘al oilalar reyestriga kiritilgan oilalarga bazaviy hisoblash miqdorining 150 baravari (56 mln 250 ming so‘m)gacha bo‘lgan miqdorda yordam ko‘rsatiladi. Bu 2025 yil 30 yanvarda qabul qilingan “Aholini ijtimoiy himoya qilish tizimini moliyalashtirish tartib-taomillarini takomillashtirish to‘g‘risida”gi Prezident farmonida belgilangan. 

Farmonga muvofiq bunday holatga tushgan o‘zbekistonliklarga uy-joylarini tiklash va ta’mirlash xarajatlarini qoplash uchun “Saxovat va ko‘mak” jamg‘armasi orqali 150 baravarigacha bo‘lgan miqdorda yordam ko‘rsatiladi.

Shuningdek, hujjatda “Yoshlar daftari” jamg‘armasi hisobidan nogironligi bo‘lgan yoshlarga parasport to‘garaklariga qatnashishi uchun yo‘l haqi xarajatlarini har oyda BHMning 1 baravarigacha miqdorda qoplab berish belgilangan. Bunda nogironligi bo‘lgan yoshlarning parasport to‘garaklariga qatnashishi Sport vazirligining “ERP-sport” axborot tizimi orqali monitoring qilib boriladi. Jamg‘arma hisobidan 6 oy davomida muntazam ravishda sport va san’at to‘garaklariga qatnashayotgan yoshlar uchun qiymati BHMning 10 baravari (3 mln 750 ming so‘m)dan oshmaydigan maxsus sport forma, inventar, musiqa va cholg‘u asboblarini xarid qilish uchun mablag‘lar ajratiladi. 

Bundan tashqari, Qoraqalpog‘iston Respublikasi va Xorazm viloyatida muhtoj oilalarga bir marta beriladigan moddiy yordam o‘rniga ushbu hududlarda yashovchi Kambag‘al oilalar reyestriga kiritilgan oilalarga uy-joyida artezian quduq qazish, suv nasoslarini o‘rnatish hamda ichimlik suv filtrlarini xarid qilish xarajatlarini qoplash uchun subsidiya ajratish tartibi joriy etiladi. Bunda subsidiya xarajatlarning 90 foizi, biroq BHMning 30 baravari (11 mln 250 ming so‘m)dan ko‘p bo‘lmagan miqdorda ajratiladi.

Yuqoridagilar bugun, 1 apreldan kuchga kirdi.