YeI X'ni mlrd dollar jarimaga tortmoqchi

Yevropa Ittifoqi regulyatorlari amerikalik milliarder Ilon Maskka tegishli X (sobiq Twitter) ijtimoiy tarmog‘iga “noqonuniy kontent va dezinformatsiyaga qarshi kurash to‘g‘risidagi qonunni buzgani uchun” jiddiy sanksiyalar joriy qilmoqchi. Bu haqda kecha, 3 aprel kuni “The New York Times” xabar berdi.

“Bu qadam Qo‘shma Shtatlar bilan munosabatlarda keskinlikni kuchaytirishi mumkin, chunki u Prezident Trampning eng yaqin maslahatchilaridan biriga qarshi qaratilgan”, deya Maskka ishora qilgan gazeta.

Ma’lum qilinishicha, jazolar jarima va “mahsulotga o‘zgartirishlar kiritish” talablarini o‘z ichiga oladi. Ayni paytda Yevropa Ittifoqi rasmiylari Maskning ijtimoiy tarmoqlariga qancha jarima solish kerakligini muhokama qilmoqda - ammo manbalardan birining so‘zlariga ko‘ra, jarima bir milliard dollardan oshishi mumkin.

Shu tariqa, yevropaliklar boshqa kompaniyalarni Yevropa Ittifoqining raqamli xizmatlar to‘g‘risidagi qonunini buzishdan saqlab qolishga umid qilmoqda.

Ilon Maskning X ijtimoiy tarmog‘iga nisbatan tergov 2023 yilda boshlangan. 2024 yilning yozida Yevrokomissiya ijtimoiy tarmoq Yevropa Ittifoqining raqamli xizmatlar to‘g‘risidagi qonunining bir qator moddalarini buzayotganini ma’lum qildi. Yevropa Ittifoqi versiyasiga ko‘ra, X mikroblog xizmati “ko‘k belgi”li tasdiqlangan hisoblar uchun o‘z interfeysini noto‘g‘ri ishlab chiqadi va foydalanadi, natijada foydalanuvchilar profillarning haqiqiyligi va u yerda e’lon qilingan kontentning ishonchliligiga shubhalar ortib boradi. Bundan tashqari, YeK ma’lumotlariga ko‘ra, X ijtimoiy tarmog‘i reklama shaffofligi talablariga rioya qilmaydi va tartibga soluvchilarga umumiy foydalanishdagi ma’lumotlardan foydalanish imkoniyatini bermaydi.

Eslatib o‘tamiz, avvalroq Ilon Mask o‘zining sun’iy intellekt sohasidagi ishlanmalar bilan shug‘ullanuvchi xAI kompaniyasi unga tegishli X ijtimoiy tarmog‘ini 33 milliard dollarga sotib olganini e’lon qildi.

Tesla va SpaceX rahbari Ilon Mask 2022 yil oktyabr oyida ijtimoiy tarmoqni 44 milliard dollarga sotib olib, Twitter egasiga aylandi. Tez orada ijtimoiy tarmoq o‘z nomini X'ga o‘zgartirdi.