Илон Маск X’ни сотди

Миллиардер Илон Маск ўзининг Х ижтимоий тармоғини сунъий интеллектни ривожлантираётган xAI стартапига сотганини маълум қилди. Бу ҳақда у ўзининг ижтимоий тармоқдаги саҳифасида ёзди.

Тадбиркорнинг сўзларига кўра, xAI 80 миллиард долларга, Х эса 33 миллиард долларга баҳоланган (45 миллиард доллар минус 12 миллиард доллар қарз). Унинг ўзи ижтимоий тармоқни 2022 йилда 44 миллиард долларга сотиб олган.

“xAI ва Х келажаги бир-бири билан чамбарчас боғлиқ. Бу келишув xAI'нинг илғор AI қобилиятлари ва тажрибасини Х'нинг кенг қамрови билан бирлаштириб, улкан салоҳиятни очиб беради”, деб ёзган Маск.

Ижтимоий тармоқ аллақачон xAI'дан Grok чатботини бирлаштирган бўлиб, у 2023 йил охиридан бошлаб премиум обуначиларга тақдим этилиб келинмоқда. 

“Bloomberg”нинг ёзишича, бирлашган компания XAI Holdings номини олган ва унинг қиймати қарз мажбуриятларини ҳисобга олмаганда 100 миллиард доллардан ошади. Агентлик маълумотларига кўра, Morgan Stanley молиявий конгламерати келишувни қўллаб-қувватлашда иштирок этган.

CNN'нинг хабар беришича, Маск “сунъий интеллект бўйича етакчи сифатида ўзини кўрсатишга” ҳаракат қилмоқда ва бу АҚШ Президенти Дональд Трамп маъмуриятини ҳам қизиқтирмоқда. Жорий йилнинг бошида Маск ChatGPT чатбот ишлаб чиқарувчиси OpenAI'ни қарийб 100 миллиард долларга сотиб олишга уринган инвесторлар консорциумини бошқарган. У узоқ вақтдан бери рақиб бўлиб келган OpenAI бош директори Сем Алтман “Агар хоҳласангиз, Twitter'ни 9,74 миллиард долларга сотиб оламиз”, деганди ўшанда.

Ижтимоий тармоқни сотиб олгандан сўнг Маск компания ходимларининг 80 фоизини ишдан бўшатди, платформани текшириш тизимини ўзгартирди, баҳсли баёнотлар учун блокланган фойдаланувчи аккаунтларини тиклади ва баъзи йирик реклама берувчиларни ижтимоий тармоқни тарк этишга мажбур қилган бир қатор бошқа ўзгаришларни амалга оширди. Бироқ, улар яқинда қайтишни бошлади, хусусан, Amazon ва Apple яна Х'га қайта сармоя киритмоқда. 

“Ижтимоий тармоқ қийматининг ўсишига таъсир қилган энг муҳим омиллардан бири Маскнинг АҚШ Президенти маъмуриятига тайинланиши – у Ҳукумат самарадорлиги департаментини (DOGE) бошқаради”, дейди CNN.