“OpenAI сотилмайди”. Альтман Маскнинг таклифини рад этди

Аввалроқ, миллиардер Илон Маск бошчилигидаги инвесторлар консорциуми OpenAI’ни назорат қилувчи нотижорат ташкилотни 97,4 миллиард долларга сотиб олиш бўйича таклиф берганди. OpenAI кенгаши Маскнинг бу таклифини рад этади. Бу ҳақда компания раиси Брет Тейлор OpenAI’нинг Х ижтимоий тармоғидаги саҳифасида маълум қилди.

Компания раисига кўра, OpenAI сотиш учун яратилмаган ва компания кенгаши бу таклифни бир овоздан рад этган.

“Ҳар қандай потенциал қайта ташкил этиш OpenAI’нинг нотижорат ташкилот сифатида қолишига ва сунъий умумий интеллект (AGI) инсоният фойдасига хизмат қилишига ёрдам беради”, дейди у.

Бироздан сўнг эса OpenAI’нинг бош директори Сэм Альтман ҳам Х’да ҳазиломуз тарзда шундай пост қолдирган:

“Йўқ, раҳмат, агар хоҳласангиз, биз  Twitter’ни 9,74 миллиард долларга сотиб оламиз”.

Маскнинг таклифи OpenAI учун вазиятни янада мураккаблаштириши мумкин. Компания айни дамда даромад келтирувчи тузилма сари ўтиш жараёнида. Нашрга кўра, директорлар кенгаши нотижорат ташкилот учун энг яхши қарорни қабул қилиши керак, яъни Алтьманнинг компанияни бўлиш режалари Маскнинг таклифидан афзалроқ эканини исботлаши лозим.

Маскнинг адвокатлари судга тақдим этган ҳужжатда миллиардер агар OpenAI нотижорат ташкилот сифатида қолишга рози бўлса, таклифини қайтариб олишини маълум қилган.

Маск ўтган йилнинг август ойида Альтман, OpenAI ва Microsoft’ни судга бериб, уларни шартномани бузганликда айблаганди. 2024 йил ноябрь ойида Маск АҚШ округ судьясидан OpenAI’нинг тижоратга айланишини блоклаш бўйича дастлабки тақиқ қўйишни сўраган.