VKontakte va Odnoklassniki’da eng ko‘p muhokama qilingan futbolchilar ma’lum qilindi

Argentinalik Lionel Messi, portugaliyalik Krishtianu Ronaldu va fransiyalik Kilian Mbappe VKontakte va Odnoklassniki ijtimoiy tarmoqlari talqiniga ko‘ra Qatardagi Jahon chempionatida eng ko‘p muhokama qilingan futbolchilarga aylandi. Bu haqda TASS nashri xabar berdi.

VKontaktening eng kuchli uchligi Messi, Ronaldu va Mbappe bo‘ldi. Ijtimoiy tarmoqdagi ochiq postlar va izohlardagi muhokama bo‘yicha to‘rtinchi o‘rinni Neymar (Braziliya), beshinchi – Anxel Di Mariya (Argentina), oltinchi – Emiliano Martines (Argentina) egalladi. Luka Modrich (Xorvatiya), Olive Jiru (Fransiya), Dominik Livakovich (Xorvatiya) va Vinisius Junior (Braziliya) ham eng ko‘p muhokama qilingan o‘n futbolchi qatoridan joy oldi.

Odnoklassniki talqiniga ko‘ra, dastlabki uch o‘rinni VKontaktedagi kabi Messi, Ronaldu va Mbappe egallagan. Olive Jiru to‘rtinchi, Modrich beshinchi, Risharlison (Braziliya) esa oltinchi o‘rinda qayd etildi. Kuchli o‘ntalikdan mos ravishda Gavi (Ispaniya), Deyan Lovren (Xorvatiya), Livakovich va Di Mariya joy oldi.

Argentina terma jamoasi Qatarda bo‘lib o‘tayotgan Jahon chempionati finalida Fransiya terma jamoasini penaltilar seriyasida 4:2 hisobida mag‘lub etib, uchinchi bor kubokni qo‘lga kiritdi. Uchinchi o‘rin uchun kechgan bahsda marokashliklarni 2:1 hisobida mag‘lub etgan xorvatlar bronza medallarini qo‘lga kiritdi.