Vaziyat o‘z yechimini topdi — Allamjonov

O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi direktori Komiljon Allamjonov ikki kundan buyon odamlar e’tiborida turgan mavzu – Toshkent shahar hokimi Jahongir Ortiqxo‘jayevning jurnalistlarga tahdid ko‘rinishida audioyozuvi bilan bog‘liq masalalar so‘nggi tafsilotlari yuzasidan munosabat bildirdi. U o‘zining Telegram’dagi kanalida shunday yozadi: 

“O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi shuni ma’lum qiladiki, OAV va ijtimoiy tarmoqlarda keng muhokama qilinayotgan Toshkent shahar hokimi J.Ortiqxo‘jayev bilan bog‘liq vaziyat o‘z yechimini topdi, buni ikki tomon ham tasdiqlab turibdi.

Mazkur nizoning jamoatchilik, ommaviy axborot vositalari va blogerlar tomonidan faol tarzda muhokama qilinishi, bunga Bosh prokuratura, Jurnalistlar ijodiy uyushmasi, Adliya vazirligi va siyosiy partiyalarning tezkor munosabat bildirishi mamlakatimizda jamoatchilik nazoratining kuchi tobora ortayotgani, jamiyatda demokartik o‘sishning shakllanayotgani, OAVning bosqichma-bosqich “to‘rtinchi hokimiyat”ga aylanayotgani, respublikamizning ochiqlik sari dadil odimlayotganidan dalolat beradi.

Vaziyatni yanada chigallashtirishga yo‘l qo‘ymaslik uchun, shuningdek, Kun.uz tahririyati iltimosini inobatga olgan holda, Agentlik blogerlar va jurnalistlarni shahar hokimining ushbu nashr jamoasi bilan uchrashuvi natijalarini hisobga olishga va bundan keyin bu mavzuni bo‘rttirmaslikka chaqiradi.

Ishonamizki, tegishli davlat idoralari tomonidan ushbu masalani o‘rganish ishlari oxiriga yetkaziladi va unga to‘laqonli huquqiy baho beriladi”.

Eslatib o‘tamiz, bugun, 18 noyabr tongida Kun.uz Toshkent shahar hokimi Jahongir Ortiqxo‘jayev bilan murosaga kelganini e’lon qilgandi. 

Bu orada Jurnalistlar uyushmasi, Prezident Administratsiyasi huzuridagi Axborot va ommaviy kommunikatsiyalar agentligi, Bosh prokuratura, Adliya vazirligi, siyosiy partiyalar o‘z bayonotlari bilan chiqishdi. Bosh prokuratura o‘rganish ishlarini olib borayotganini ma’lum qildi.