Vazirlar Mahkamasi DXM ko‘rsatadigan xizmatlar ro‘yxatini tasdiqlaydi

O‘zbekiston Respubdlikasi Vazirlar Mahkamasi Davlat xizmatlari markazlari tomonidan ko‘rsatiladigan xizmat ro‘yxatini tasdiqlaydi. Bu haqda Hukumatning yangi qarori loyihasida ko‘rsatilgan.

Qaror bilan quyidagilar Davlat xizmatlari markazlari orqali ko‘rsatiladigan davlat xizmatlarini yanada takomillashtirishning asosiy yo‘nalishlari etib belgilanadi:

•    davlat xizmatlari ko‘rsatish tartibini belgilovchi qoidalarni yagona hujjatda jamlash;

•    davlat xizmatlari ko‘rsatishda yuridik yoki jismoniy shaxslarning bevosita ishtirok etishini talab qiladigan hujjatlar va tartibotlar soni hamda ko‘rsatiladigan xizmatlarning muddatlarini qisqartirish;

•    ma’muriy ish natijasida qabul qilinadigan ma’muriy hujjatlarga qo‘yilayotgan talablarni tizimlashtirgan holda Davlat xizmatlari markazlari orqali davlat xizmatlarini ko‘rsatuvchi vakolatli organlar tomonidan yagona huquqiy amaliyotni qo‘llash;

•    “Ma’muriy tartib-taomillar to‘g‘risida”gi Qonun tamoyillarini keng qo‘llagan holda, formal kamchiliklar sababli davlat xizmatini ko‘rsatishni rad etish holatlarini bekor qilib, xatolarni to‘g‘rilash va yetishmayotgan hujjatlarni taqdim etish imkoniyatini berish orqali ma’muriy ish yuritishni to‘xtatib turish va tiklash institutini joriy etish;

•    yuridik va jismoniy shaxslardan boshqa davlat organlari va o‘zga tashkilotlardan olinadigan hujjatlar va ma’lumotlarning talab qilinishini bekor qilish;

•    davlat organlari va boshqa tashkilotlar faoliyati samaradorligini, tezkorligini va shaffofligini ta’minlash, ularning mas’uliyatini va ijro intizomini kuchaytirish;

•    tadbirkorlik sub’ektlariga davlat xizmatlari ko‘rsatishning sifati va oshkoraligini, ulardan foydalanish imkoniyatlarini yanada oshirish, tadbirkorlarning huquq va qonuniy manfaatlarini himoya qilish, kafolatlarini kuchaytirish.

Quyidagilar:

Davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali orqali davlat xizmatlari ko‘rsatishning ma’muriy reglamenti 1-ilovaga muvofiq;

Davlat xizmatlari markazlari tomonidan ko‘rsatiladigan davlat xizmatlari ro‘yxati (keyingi o‘rinlarda Ro‘yxat deb yuritiladi) 2-ilovaga muvofiq tasdiqlanadi.

Qarorga muvofiq quyidagilar belgilanadi:

Ro‘yxatga muvofiq ko‘rsatiladigan davlat xizmatlaridan foydalanish uchun yuridik va jismoniy shaxslar faqat Davlat xizmatlari markazlari yoki YAIDXP orqali murojaat qiladilar;

Davlat xizmatlari markazlari orqali yangi turdagi davlat xizmatlarini joriy etish Ro‘yxatga tegishli qo‘shimchalar kiritish orqali amalga oshiriladi;

agar Ro‘yxatda belgilangan davlat xizmatlarini ko‘rsatuvchi vakolatli organlar tadbirkorlik faoliyatining ayrim turlari bilan shug‘ullanish huquqini beradigan litsenziya va ruxsat etuvchi tusdagi hujjatni berish to‘g‘risidagi arizani ko‘rib chiqish muddati davomida litsenziya va ruxsat etuvchi tusdagi hujjatni berish yoki berishni rad etish to‘g‘risida qaror qabul qilmasa, ariza beruvchi arizani ko‘rib chiqish muddati o‘tganidan so‘ng vakolatli organni yozma ravishda xabardor qilgan holda arizada ko‘rsatilgan faoliyat turini amalga oshirishga haqlidir. Bunda vakolatli organ ariza beruvchining yozma xabarnomasi olingandan keyin ikki ish kuni ichida unga litsenziya yoki ruxsat etuvchi tusdagi hujjatni berishi;

eksperimental tarzda Ro‘yxatdagi litsenziyalashda litsenziya shartnomasini elektron shaklda YAIDXP orqali vakolatli organning elektron ofertani (shartnoma tuzish haqida taklif) yo‘llashi va ariza beruvchi uni akseptlashi (taklifni qabul qilishi) yo‘li bilan tuzish shart.

Qaror loyihasi muhokamasi joriy yilning 14 noyabriga qadar davom etadi. Loyihaga o‘zgartirish kiritilishi va bekor qilinishi mumkin.