“Valensiya” bilan o‘yinda “Real”ning yana bir a’zosi irqchilikka uchragani aniqlandi

La Liga mutaxassislari “Valensiya” klubi muxlislarining “Real”ning braziliyalik futbolchisi Eder Militaoga nisbatan irqchilik qilganini aniqlab, sudga xat yo‘lladi. Bu haqda “Cope” xabar berdi.

Hozirda Vinisius bilan bog‘liq irqchilik ishi ko‘rib chiqilmoqda. La Liga sudga xat yo‘llab, o‘sha o‘yinda “Mestalya” stadioni tribunalaridan irqchilikka asoslangan haqoratlar madridliklar himoyachisi Eder Militaoga ham aytilganini aniqladi. Liga o‘z xatida suddan holatga nisbatan chora ko‘rishni talab qilib, o‘z vakiliga sudda nutq so‘zlash imkoniyatini so‘radi.

Ta’kidlash joiz, “Valensiya” “Real” bilan o‘yinda irqchilik qilingani uchun 45 ming yevro jarimaga tortilgandi. Shuningdek, La Liga “Mestalya” tribunalaridan birini 5 ta o‘yinga yopib qo‘ydi, biroq keyinchalik jazo 27 ming yevro va 3 ta o‘yinga qisqartirildi.

Eslatib o‘tamiz, o‘tgan mavsumda Ispaniya chempionati doirasidagi o‘yinda “Valensiya” muxlislari “Real” vingeri Vinisius Juniorni “maymun” deb haqorat qilgan, shu munosabat bilan o‘yin 8 daqiqaga to‘xtatilgan edi.

Shuningdek, o‘yin davomida Vinisius maydondan chetlatilgandi. Braziliyalik futbolchi ikkinchi bo‘limga qo‘shib berilgan vaqtda “Valensiya” futbolchilari bilan bo‘lgan mushtlashuvda bevosita ishtirok etdi va futbolchi faoliyati davomida birinchi marta to‘g‘ridan-to‘g‘ri qizil kartochka oldi.

“Valensiya” – “Real” o‘yinining bahsli epizodida Vinisisus raqib futbolchisi Ugo Duroni urishidan oldin, “Valensiya” a’zosi braziliyalik futbolchini bo‘g‘ib olgandi. Bosh hakam Rikardo Bengoechea videotakrorni ko‘rib, braziliyalik futbolchiga qizil kartochka ko‘rsatib, Duroning harakatlarini esa e’tiborsiz qoldirdi.

Ispaniya sport musobaqalari qo‘mitasi (RFEF) ko‘p soatlik muhokamalardan so‘ng, Vinisiusni diskvalifikatsiyani bekor qilishga qaror qildi. Sababi “Real” – “Valensiya” uchrashuvi hakami voqea haqida, jumladan, uning asosiy qismi haqida to‘liq ma’lumotga ega bo‘lmagani uchun epizodga noto‘g‘ri baho bergan.