O‘zgacha inauguratsiya. Bayden bayroqlar oldida qasamyod qiladi (fotoreportaj)

Avval xabar berganimizdek, bugun, 20 yanvar kuni AQSHning saylangan Prezidenti Jo Baydenning inauguratsiya marosimi o‘tkaziladi. 

Shu munosabat bilan Vashingtondagi Kongress binosi oldida AQSHning 200 mingta bayrog‘i o‘rnatildi. 

Qayd etilishicha, bu koronavirus pandemiyasi tufayli tadbirda shaxsan qatnasha olmaydigan fuqarolarni ifodalaydi. 

Nashrda xabar qilinganidek, 18 yanvar kuni kechqurun Baydenning inauguratsiya qo‘mitasi ushbu "Bayroq maydoni"ni 56 ta chiroq bilan yoritgan. Bu esa AQSHning 50 ta shtati va har bir hududini ifodalaydi. 

Chiroqlar Jo Bayden AQSHning 46-Prezidenti bo‘layotgani uchun 46 soniya davomida yongan. 

Ta’kidlanishicha, pandemiya sabab Jo Baydenning AQSHning 46-Prezidenti sifatida qasamyod qilishi, avvalgi inauguratsiyalardan farqli o‘laroq, "juda sokin" tarzda o‘tadi. 

Manbaga ko‘ra, AQSH poytaxti hozir juda sokin. Baydenning inauguratsiyasida faqatgina o‘n minglab xavfsizlik xodimlari va fuqarolarning o‘rniga yuz minglab bayroqlar qatnashishi kutilmoqda.

Ma’lumot o‘rnida, AQSHda 2020 yil 3 noyabr kuni prezidentlik saylovlari bo‘lib o‘tdi. Prezidentlikka asosiy da’vogarlar – demokrat Jo Bayden va amaldagi rahbar, respublikachi Donald Tramp edi.

Ommaviy va saylovchilarning ovoz berish natijalariga ko‘ra, Bayden saylovda g‘alaba qozondi.