O‘zbekistonlik taniqli futbol mutaxassisi vafot etdi

Uzoq yillar davomida o‘zbek futboli rivojiga hissa qo‘shgan mutaxassis Muxtor Hoshimov vafot etdi. Bu haqda O‘zbekiston futbol assotsiatsiyasi matbuot xizmati xabar berdi.

Muxtor Muinovich Hoshimov 1948 yilda tavallud topgan. 1960 yilda “Paxtakor” futbol maktabida shug‘ullanishni boshlagan. 1965 yilda O‘zbekiston terma jamoasi safida yoshlar kubogi sohibi bo‘lgan. 

Futbolchilik faoliyati davomida “Politotdel”, “Dimitrovets”, “Oq oltin” jamoalarida to‘p surgan. 

1972 yilda murabbiylik faoliyatini boshlagan. 1993 yilda o‘sha vaqtdagi O‘zbekiston futbol federatsiyasida ommaviy futbol bo‘limi boshlig‘i, 2006 yildan esa musobaqalar bo‘limi boshlig‘i, 2009–2017 yillar davomida esa O‘zbekiston futzal assotsiatsiyasining birinchi vitse-prezidenti lavozimlarida ishlagan. Umrining so‘nggi yillarida esa O‘FA futbolchilarning maqomi va o‘tishi bo‘yicha qo‘mita raisi sifatida faoliyat yuritgan.