O‘zbekistonlik taekvondochi qiz Jahon chempioni bo‘ldi

Ayni kunlarda Meksikaning Gvadalaxara shahrida taekvondo WT bo‘yicha Jahon chempionati bahslari bo‘lib o‘tmoqda. 17 noyabr kungi bellashuvlarda uch nafar O‘zbekiston vakili medallar uchun kurashga kirishdi. 

E’tiborlisi, ayollar o‘rtasida +73 kgda mamlakat sharafini himoya qilgan Svetlana Osipova Jahon chempionligini qo‘lga kiritdi. Finalgacha bo‘lgan yo‘lni ishonchli tarzda bosib o‘tgan Osipova hal qiluvchi bahsda isroillik Dana Arzanni 3 raundda (2:1) mag‘lubiyatga uchratdi. Shunday qilib, Svetlana Jahon chempionatlarida g‘alaba qozongan birinchi o‘zbekistonlik taekvondochi qizga aylandi.

Kechagi kungi bahslarda erkaklar o‘rtasida +87 kg vazn toifasida Marat Mavlonov ikkinchi boshqichda amerikalik Jonatan Heliga 1:2 hisobida imkoniyatni boy berdi. 

Eslatib o‘tamiz, hozircha O‘zbekiston delegatsiyasi hisobida 3 ta medal mavjud. Bungacha Nikita Rafalovich va Feruza Sodiqova mundial bahslarining bronza medali sohibiga aylanishgandi.