O‘zbekistonda yer va suv solig‘ini oshirish rejalashtirilyapti

O‘zbekistonda yer va suv resurslaridan foydalanganlik uchun soliq stavkalarini ochirish rejalashtirilmoqda. Bu haqda Oliy Majlis Qonunchilik palatasining majlisida ko‘rib chiqilgan “O‘zbekiston Respublikasining Soliq kodeksiga o‘zgartish va qo‘shimchalar kiritish to‘g‘risida”gi qonun loyihasida ko‘zda tutilgan.

Taklif etilayotgan loyihada foyda solig‘ini hisoblab chiqarishda chegirmalarga kiritiladigan amortizatsiya ajratmalari normalarini o‘rtacha 2 baravarga oshirish, bir martalik investitsiyaviy chegirma miqdorlarini, binolar bo‘yicha – 10 foiz, yangi texnologik asbob-uskuna bo‘yicha – 20 foiz belgilangan holda 2 baravarga oshirish nazarda tutilmoqda.

Shuningdek, ko‘chmas mulk joylashgan joyidan kelib chiqib bir kvadrat metr uchun minimal qiymat joriy etish bilan birga yuridik shaxslarning mol-mulk solig‘i stavkalarini pasaytirish, polietilen granulalariga aksiz solig‘i stavkasini 20 dan 10 foizgacha pasaytirgan holda, ushbu stavkani uning importiga ham joriy etish belgilanyapti.

Yer solig‘i, suv resurslaridan foydalanganlik uchun esa soliq va aksiz solig‘i stavkalari o‘rtacha 10 foizga indeksatsiya qilish nazarda tutilyapti. Bunda, qishloq xo‘jalik yerlarini sug‘orish uchun foydalanilgan suv hajmi qismi va baliqlarni o‘stirish (yetishtirish), shu jumladan, dehqon xo‘jaliklari uchun belgilangan suv resurslaridan foydalanganlik uchun soliq stavkalari 2021 yil darajasida (1 kub metr uchun 40 so‘m) saqlab qolinmoqda.

Shu bilan birga, loyihada soliq solish bilan bog‘liq bo‘lgan ob’ektlar hisobini tashkil etish, xususan, soliq imtiyozlari hisobi bo‘yicha yagona avtomatlashtirilgan tizimni yaratish, soliq to‘lovchining hisob ma’lumotlaridagi o‘zgarishlarni shaxsiy kabinet orqali tasdiqlash masalasi ham aks etgan.

Majlisda deputatlar tomonidan loyihani yanada takomillashtirish bo‘yicha berilgan takliflar inobatga olingan holda, qonun loyihasi qabul qilindi.