O‘zbekistonda yana bir jamoat fondi tuziladi

Normativ-huquiy hujjatlar loyihalari muhokamasi portalida “Shon-sharaf muzeyini rivojlantirish jamoat fondini tashkil etish to‘g‘risida”gi qaror loyihasi joylashtirildi. 

Qaror bilan O‘zbekiston Respublikasi Mudofaa vazirligi va Moliya vazirligining yuridik shaxs maqomiga ega bo‘lmagan Shon-sharaf muzeyini rivojlantirish jamoat fondini tashkil etish to‘g‘risidagi taklifiga rozilik berilishi mumkin.

Quyidagilar Fond mablag‘larini shakllantirish manbalari etib belgilanadi:

•    pullik xizmatlar ko‘rsatishdan tushadigan mablag‘lar;

•    yuridik va jismoniy shaxslarning homiylik xayriyalari;

•    xalqaro tashkilotlar va moliya institutlarining, shuningdek, boshqa xorijiy donorlarning grantlari;

•    Fondning vaqtincha bo‘sh mablag‘larini tijorat banklari depozitlariga joylashtirishdan tushgan daromadlar bo‘yicha tushumlar;

•    qonun hujjatlarida taqiqlanmagan boshqa manbalar.

Belgilanishicha, Fond mablag‘lari:

a) O‘zbekiston Respublikasi Mudofaa vazirligining Ma’naviyat va ma’rifat markazida ochiladigan hisob raqamda jamlanadi;

b) quyidagi maqsadlarga:

Shon-sharaf muzeyi uchun tarixiy eksponatlar, ashyolar va kolleksiyalar, urush qatnashchilarining orden-medallari, shaxsiy buyumlari hamda urush davri yodgorliklarini xarid qilish;

Shon-sharaf muzeyi ekspozitsiyalarini yaratish;

Shon-sharaf muzeyini joriy va kapital ta’mirlash, moddiy-texnik bazasini mustahkamlash;

davra suhbatlari, konferensiyalar, amaliy mashg‘ulotlar, treninglar, shuningdek madaniy-ma’rifiy, ommaviy-madaniy va boshqa tadbirlar o‘tkazish uchun sarflanadi.