O‘zbekistonda birinchi Markaziy Osiyo–Yevropa Ittifoqi sammiti bo‘lib o‘tadi 

Joriy yil 22 sentyabr kuni Belgiyaning Bryugge shahridagi Yevropa kollejida Markaziy Osiyo davlatlari elchilari Yevropaning yetakchi diplomatiya akademiyasi rektori, Yevropa Ittifoqining 2014-2019 yillardagi tashqi ishlar va xavfsizlik siyosati bo‘yicha sobiq oliy vakili Federika Mogerini hamda Diplomatiya akademiyasi tinglovchilari bilan uchrashdi. Bu haqda “Dunyo” axborot agentligi xabar berdi.

Uchrashuvda Federika Mogerini kelgusi yili O‘zbekistonda birinchi Markaziy Osiyo–Yevropa Ittifoqi sammiti bo‘lib o‘tishi kutilayotganini ma’lum qilgan.

“Ikki tomonlama aloqalar tobora kengayib bormoqda, davlat rahbarlarining ko‘p tomonlama uchrashuvlari bo‘lib o‘tmoqda, kelgusi yili O‘zbekistonda birinchi Markaziy Osiyo–Yevropa Ittifoqi sammiti bo‘lib o‘tishi kutilmoqda. Markaziy Osiyo mamlakatlari va Yevropa Ittifoqi savdo va iqtisodiyot, barqaror rivojlanish, xavfsizlik va atrof-muhit, islohotlarni amalga oshirish, inson huquqlari va yaxshi boshqaruvni mustahkamlash, shuningdek, mintaqaviy hamkorlik va o‘zaro bog‘liqlik sohalarida bir-birlari uchun qimmatli sheriklardir”, degan u.

Yevropa komissiyasi 2024 yil boshida Bryusselda bo‘lib o‘tadigan investitsiya forumiga hozirlik ko‘rayotgani va barqaror transport kommunikatsiyalarini, xususan, Markaziy Osiyoni Yevropa bilan bog‘laydigan va mintaqa mamlakatlariga tashqi bozorlarga qo‘shimcha kirish imkonini beruvchi Trans-Kaspiy yo‘lagini rivojlantirish uchun moliyalashtirishga e’tibor qaratilishi, shuningdek, Markaziy Osiyo va Yevropa Ittifoqi mamlakatlari hamkorlikning eng yuqori darajasiga ko‘tarilgani qayd etilgan.

Akobir Sayidov