O‘zbekiston, Tojikiston va Qirg‘iziston Prezidentlari Xo‘jandda uchrashdi

Bugun, 31 mart kuni Tojikiston poytaxti Xo‘jand shahrida O‘zbekiston Prezidenti Shavkat Mirziyoyev, Tojikiston Prezidenti Imomali Rahmon va Qirg‘iziston Prezidenti Sadir Japarov o‘rtasida uchrashuv boshlandi. Bu haqda Tojikiston rahbarining matbuot xizmati xabar berdi.

Ma’lum qilinishicha, uchrashuv avvalida Tojikiston rahbari Imomali Rahmon qo‘shni davlatlar rahbarlarini samimiy qutlab, ularni Navro‘z bayrami bilan yana bir bor tabriklagan.

“Biz Tojikistonda Qirg‘iziston va O‘zbekiston bilan yaxshi qo‘shnichilik, teng huquqlilik, hurmat va o‘zaro manfaatlarni hisobga olishga asoslangan munosabatlarni yuksak qadrlaymiz”, degan Tojikiston rahbari.

Shu bilan birga, Imomali Rahmon Tojikiston, Qirg‘iziston va O‘zbekiston o‘rtasida uch davlatning davlat chegaralarining tutash nuqtasi to‘g‘risidagi shartnoma imzolanganini “juda muhim voqea”, deb baholagan.

Qolaversa, davlat rahbari Ittifoqchilik munosabatlari to‘g‘risidagi shartnoma imzolangani va bu haqda tasdiqlovchi maktublar almashilganidan mamnunligini bildirib, ushbu tarixiy hujjatning imzolanishi bilan “Tojikiston va O‘zbekiston o‘rtasidagi munosabatlarda rivojlanishning sifat jihatidan yangi bosqichi boshlanganini” alohida ta’kidlagan.

Imomali Rahmon o‘z nutqi so‘nggida uch qo‘shni davlat rahbarlarining bugungi uchrashuvi yakunlari “do‘stlik, yaxshi qo‘shnichilik munosabatlari, o‘zaro anglashuv, hurmat va ishonchni, shuningdek, mamlakatlar va qardosh xalqlar o‘rtasidagi konstruktiv va samarali hamkorlikni yanada mustahkamlashga xizmat qilishiga” ishonch bildirgan.

Eslatib o‘tamiz, O‘zbekiston Respublikasi Prezidenti Shavkat Mirziyoyev bugun, 31 mart kuni Xo‘jand shahriga kelgach, Tojikiston Respublikasi Prezidenti Imomali Rahmon bilan uchrashuv o‘tkazgandi. Endilikda O‘zbekiston, Tojikiston va Qirg‘iziston davlat chegaralarining tutash nuqtasi to‘g‘risidagi shartnomani imzolash rejalashtirilgan. Prezidentlar san’at ustalari ishtirokidagi qo‘shma konsertda ham ishtirok etadi.