O‘zbekiston media futbol terma jamoasi Jahon chempionatini g‘alaba bilan boshladi

Italiyaning Milan shahrida start olgan media futbol bo‘yicha Jahon chempionatida O‘zbekiston sharafini himoya qiladigan “Anvonted boys” jamoasi ilk o‘yinda Saudiya Arabistoni termasini mag‘lub etdi.

2025 yilning ilk kunidan start olgan Jahon chempionatida O‘zbekiston jamoasi Saudiya Arabistoni termasini 4:3 hisobida mag‘lub etib, keyingi bosqichga yo‘l oldi.

Shu tariqa O‘zbekiston terma jamoasi, ya’ni “Anvonted boys”ning keyingi bosqichdagi raqibi AQSH termasi bo‘ladi.

Qayd etish joiz, O‘zbekiston media jamoasi ishtirok etayotgan musobaqa “Kings League” deb nomlanib, media futbol olamida Jahon chempionati sifatida tan olinadigan musobaqa hisoblanadi. Turnir 12 yanvarga qadar davom etadi. Finalga Turin shahridagi “Yuventus” klubining “Alyans” stadioni mezbonlik qiladi. 

Ma’lumot o‘rnida, mazkur musobaqada 16 ta terma jamoa ishtirok etmoqda va ilk turda g‘alaba qozongan jamoa keyingi bosqichga to‘g‘ridan to‘g‘ri yo‘l oladi. Mag‘lub bo‘lgan jamoa esa o‘tish o‘yinida ishtirok etadi.