O‘zbekiston maktablarida birinchi sinfga qabul qachondan boshlanishi ma’lum qilindi

O‘zbekiston maktablarida birinchi sinfga qabul bugun, 20 iyundan boshlandi. Bu haqda Maktabgacha va maktab ta’limi vazirligi Matbuot xizmati xabar berdi. 

Ma’lum qilinishicha, o‘rnatilgan tartibga ko‘ra, birinchi sinfga qabul ikki bosqichda amalga oshiriladi. 

1-bosqich: mikro-hudud doirasida (20 iyundan 31 iyulgacha); 

2-bosqich: mikro-hududdan tashqarida (1-15 avgust kunlari). 

Qabul jarayoni mamlakatning 43 ta tumanida elektron shaklda o‘tkaziladi. Bunda ota-onalar 20 iyun soat 12:00 dan boshlab my.maktab.uz elektron platformasi orqali ro‘yxatdan o‘tib, ariza topshirishi mumkin. Vazirlikka elektron shaklda hujjat topshiriluvchi tumanlar ro‘yxati ham tasdiqlangan.

Qolgan barcha tumanlarda esa arizalar an’anaviy shaklda, maktab tomonidan qabul qilinadi. Birinchi sinfga qabul qilingan o‘quvchilar vazirlik elektron tizimi (adm.maktab.uz)ga kiritiladi va nazorat qilib boriladi. 

Shuningdek, vazirlik Matbuot xizmati xabarida “Ta’lim to‘g‘risida”gi qonunning 9-moddasiga asosan bolalar, ular 7 yoshga to‘ladigan yilda maktabga qabul qilinishini eslatgan. Shunga ko‘ra, bu yil 1 sinflarga 2016 yilning 1 yanvaridan 31 dekabriga qadar tug‘ilgan bolalar qabul qilinadi.