O‘z karerasini xavf ostiga qo‘yishga jur’at etgan noyob rahbar edi – Bayden Gorbachyov haqida

SSSRning birinchi va yagona prezidenti Mixail Gorbachyov “boshqa kelajak”ga erishish yo‘lida o‘z karerasini xavf ostiga qo‘yishga jur’at etgan noyob rahbar edi. Bu haqda bugun, 31 avgust AQSH Prezidenti Jo Bayden keng tarqalgan yozma bayonotida ma’lum qildi. 

Oshkoralik va qayta qurish haqida gapirar ekan, u shunday ta’kidladi:  

“Bu kamdan-kam uchraydigan rahbarning harakati edi – boshqa kelajak imkoniyatlarini ko‘rish uchun tasavvurga ega va unga erishish uchun butun martabasini xavf ostiga qo‘yish jasorati bor edi. Natijada millionlab odamlar uchun xavfsizroq dunyo va ko‘proq erkinlikka erishildi”, deydi Amerika rahbari.  

Shuningdek, u Gorbachyovni “ajoyib uzoqni ko‘ra oladigan odam” deb atagan. 

Vashington ma’muriyati rahbarining so‘zlariga ko‘ra, o‘shanda faqat bir nechta yuqori martabali sovet amaldorlari nimanidir o‘zgartirish kerakligini tan olishga jur’at eta olgan.

“Senatning tashqi aloqalar qo‘mitasi a’zosi sifatida men uning bu va boshqa ishlarni qilganini ko‘rganman. SSSR rahbari sifatida u Prezident Reygan bilan mamlakatlarimizning yadroviy arsenallarini qisqartirish, butun dunyo bo‘ylab yadroviy qurollanish poygasini to‘xtatish uchun ibodat qilayotgan odamlarga yordam berish uchun ishladi. O‘n yillik shafqatsiz siyosiy repressiyalardan so‘ng u demokratik islohotlarni qabul qildi”, deydi Oq uy rahbari.

Uning fikricha, SSSRning birinchi va yagona prezidenti oshkoralik va qayta qurishga shunchaki shior sifatida emas, balki Sovet Ittifoqi xalqlarining uzoq yillik yolg‘izlik va mahrumlikdan keyin olg‘a intilish yo‘li sifatida ishongan.

Baydenning aytishicha, 2009 yilda Oq uyda AQSH vitse-prezidenti sifatida u Gorbachyov bilan ikki davlatning yadroviy arsenallarini qisqartirish borasidagi ishlarini uzoq vaqt muhokama qilgan.

“Dunyo bo‘ylab ko‘pchilik uni nega hurmat qilishini tushunish oson edi. Biz uning oilasi va do‘stlariga hamda uning yaxshi dunyoga bo‘lgan ishonchidan bahramand bo‘lgan barchaga chuqur hamdardligimizni bildiramiz”, deya xulosa qildi davlat rahbari.

Mixail Gorbachyov 1931 yil 2 martda tug‘ilgan. U 1990 yil 15 martdan 1991 yil 25 dekabrgacha SSSRning birinchi va oxirgi prezidenti bo‘lgan. Bundan tashqari, u Sovet Ittifoqi Kommunistik partiyasi Markaziy Qo‘mitasining oxirgi Bosh kotibi va SSSR Oliy Kengashi Prezidiumining raisi lavozimlarida ishlagan.

Gorbachyov 1991 yil 25 dekabrda SSSR prezidenti lavozimidan iste’foga chiqdi, shu bilan birga Sovet Ittifoqi o‘z faoliyatini to‘xtatdi. Gorbachyov jamg‘armasida saqlanadigan mehnat daftarchasida uning davlat rahbari lavozimini tark etgani haqida hech qanday qayd yo‘q.

Eslatib o‘tamiz, Mixail Gorbachyov 30 avgust kuni kechqurun og‘ir va uzoq davom etgan xastalikdan so‘ng vafot etdi.