O‘t balosi: Turkiyada yana o‘rmon yonyapti

Turkiyada o‘rmon yong‘inlari yana avj olmoqda. Bu safar yong‘in noma’lum sabablarga ko‘ra, tunda Mug‘la viloyatidagi Dalaman tumanida boshlandi. Bu haqda “Cumhuriyet” nashri xabar bermoqda. 

Qayd etilishicha, shamol ta’sirida tez tarqalib ketgan yong‘inni o‘chirishga 5 ta birinchi yordam vositalari, 53 ta suv ombori, 17 ta suv tashuvchi tanker, 10 ta buldozer hamda o‘t o‘chiruvchilar jalb etilgan. 

Shuningdek, havo ochilishi bilan 3 ta samolyot, 16 ta vertolyot yong‘inni o‘chirish ishlariga qo‘shilgan.

Ma’lum qilinishicha, o‘t o‘chiruvchilar hali ham yong‘inni o‘chirish uchun harakat qilmoqda.

Eslatib o‘tamiz, joriy yilning 28 iyulida Turkiyada o‘rmon yong‘inlari boshlangandi. Yong‘in mamlakatning bir qancha viloyatlariga tarqalib, ularning ichida eng aziyat chekkani sayyohlik markazi — Antaliya bo‘ldi. Bir necha kun davom etgan yong‘inlar oqibatida 9 kishi halok bo‘ldi va 864 nafardan ortiq kishi jarohatlandi.