Alisher Usmonovning jiyanlariga nisbatan ochilgan jinoyat ishi to‘xtatildi

“Everton”ning sobiq direktori Sarvar Ismoilovga nisbatan ochilgan jinoyat ishi “dalillar yo‘qligi” uchun to‘xtatildi. Bu haqda BBC xabar berdi.

26 yoshli Sarvar Ismoilov va uning 34 yoshli akasi Sanjar Ismoilov Londondagi kvartirada Edmond Krasnikiga og‘ir tan jarohati yetkazganlikda ayblanayotgan edi.

Joriy yilning 11 iyun kuni yana bir shaxs, 40 yoshli Malik Bilol ham xuddi shunday jinoyatda ayblangan. Ammo ish bo‘yicha uch haftalik tanaffusdan so‘ng, Vestminster magistratura sudi ish to‘xtatiladi, degan qarorga kelgan.

Sudda Qirollik prokuraturasi tomonidan qo‘shimcha ma’lumotlar berilmagan. Xuddi shu ishda Sanjar Ismoilov ham Astrid Faychi ismli modelga hujum qilish va qiymati 5000 funt sterlingdan ziyod bo‘lgan olmos bilaguzukka zarar yetkazishda ayblangan. Sarvar Ismoilov esa joriy yilning iyul oyida “Everton” direktorlar kengashiga qo‘shilgan, biroq 2 noyabrda “shaxsiy va sog‘ligi bilan bog‘liq muammolar” sababli iste’foga chiqqan edi.

Sanjar Ismoilov “Somerset” va “Regent's” universitetidagi Millfild maktabida tahsil olgan va Oksford universitetida MVA darajasini olgan. Sarvar Ismoilov esa Ridingdagi “Leighton Park” maktabida va Londondagi “City” universitetida tahsil olgan.

Ularning amakisi rossiyalik Alisher Usmonov tog‘-kon sanoati va telekommunikatsiya sohasida milliardlab dollar ishlab topadi. U “Everton” klubiga egalik qilmasa-da, klub bilan tijoriy aloqalarga ega.