Umraga yuborish bilan noqonuniy tarzda shug‘ullanib kelgan turfirmalarga chora ko‘rildi

Bir necha viloyatlarda o‘tkazilgan maxsus tadbirlarda noqonuniy tarzda “Umra” tadbirlarini tashkil etib kelgan turfirmalarga nisbatan tegishli tartibda chora ko‘rildi. Bu haqda Din ishlari bo‘yicha qo‘mita xabar berdi.

Ma’lum qilinishicha, Farg‘ona viloyati Marg‘ilon shahrida joylashgan “Xurmo travel umra” MCHJ (Saxiy travel) fuqarolarga litsenziyasiz “Umra” tadbirini tashkil etib kelgani aniqlangan.

Qolaversa, Surxondaryo viloyati Denov shahrida “Anor tour” nomi ostida, Toshkent shahri, Chilonzor tumanida “Sokin travel” nomi ostida jismoniy shaxslar tomonidan davlat ro‘yxatidan o‘tmasdan “Umra” tadbirini tashkil etib kelgani aniqlangan.

“Yuqoridagi holatlar yuzasidan Qo‘mita tomonidan “Xurmo travel umra” MCHJ (Saxiy travel)ga nisbatan “Litsenziyalash, ruxsat berish va xabardor qilish tartib-taomillari to‘g‘risida”gi O‘zbekiston Respublikasining Qonunining tegishli moddalari talablari buzilishi yuzasidan ish qo‘zg‘atilib, ishni ko‘rib chiqish yakunlari yuzasidan BHMning 200 baravari (75 mln so‘m) jarima qo‘llash bo‘yicha qaror qabul qilindi”, deyiladi xabarda.

Shuningdek, “Anor tour” va “Sokin travel” nomlari ostida ishlab kelgan jismoniy shaxslarning xatti-harakatlari bo‘yicha to‘plangan materiallar tegishli chora ko‘rish yuzasidan huquq-tartibot organlariga yuborilgan.

Ma’lumot uchun, “Umra” tadbirlarini tashkil etish va o‘tkazishga oid xizmatlarni litsenziyaga ega bo‘lmagan tadbirkorlik sub’ektlari tomonidan ko‘rsatish taqiqlangan.

Eslatib o‘tamiz, 2024 yilning 10 dekabr kuni Samarqand viloyatida o‘tkazilgan maxsus tadbirda noqonuniy tarzda “Umra” tadbirlarini tashkil etib kelgan turfirmaga nisbatan tegishli tartibda chora ko‘rilgandi. Turistik firmaning 2002 yilda tug‘ilgan xodimi fuqaro A.D.ga tegishli litsenziyaga ega bo‘lmagan holda “Umra” ziyoratiga yuborishini va’da qilib, boshqa fuqarolardan 3600 AQSH dollari olayotgan vaqtda jinoyat ustida qo‘lga olingan.