Ukraina ilk bor Amerikaning ATACMS  raketalarini ishlatdi

Ukraina Qurolli kuchlari birinchi marta Amerikaning ATACMS  raketalaridan foydalandi. Bu haqda kecha, 17 oktyabr kuni Ukraina Prezidenti Vladimir Zelenskiy ma’lum qildi.

“AQSH Prezidenti Jo Bayden bilan kelishuvlarimiz amalga oshmoqda. Ular juda samarali – ATACMS buni isbotladi”, degan Zelenskiy kunlik videomurojaatida.

“The Wall Street Journal” nashri ham o‘z manbalariga tayanib, so‘nggi kunlarda Amerika rasmiylari Ukraina Qurolli kuchlariga 160 kilometrga yaqin masofaga uchadigan raketalarning kichik partiyasini jo‘natgani haqida xabar bergan. Biroq AQSH bu haqda rasman e’lon qilmadi.

Aytish joizki, Zelenskiy ham, WSJ ham raketalar qaysi nishonga tushganini ochiqlamagan. Biroq kecha, 17 oktyabr kuni Ukraina Qurolli Kuchlari mamlakat janubidagi Berdyansk aerodromiga hujum uyushtirganini e’lon qilgan.

Bundan tashqari, ijtimoiy tarmoqlarda Berdyanskda olingani aytilayotgan fotosuratlar paydo bo‘lib, ularda ATACMS qismlarini ko‘rish mumkin.

Eslatib o‘tamiz, o‘tgan oyda Vladimir Zelenskiy AQSHga borgan va Amerika rahbariyati bilan uchrashgandi. O‘shanda Prezident Jo Baydan  Amerikaning birinchi Abrams tanklari tez orada Ukrainaga yetkazilishini aytgandi.