Украина илк бор Американинг ATACMS  ракеталарини ишлатди

Украина Қуролли кучлари биринчи марта Американинг ATACMS  ракеталаридан фойдаланди. Бу ҳақда кеча, 17 октябрь куни Украина Президенти Владимир Зеленский маълум қилди.

“АҚШ Президенти Жо Байден билан келишувларимиз амалга ошмоқда. Улар жуда самарали – ATACMS буни исботлади”, деган Зеленский кунлик видеомурожаатида.

“The Wall Street Journal” нашри ҳам ўз манбаларига таяниб, сўнгги кунларда Америка расмийлари Украина Қуролли кучларига 160 километрга яқин масофага учадиган ракеталарнинг кичик партиясини жўнатгани ҳақида хабар берган. Бироқ АҚШ бу ҳақда расман эълон қилмади.

Айтиш жоизки, Зеленский ҳам, WSJ ҳам ракеталар қайси нишонга тушганини очиқламаган. Бироқ кеча, 17 октябрь куни Украина Қуролли Кучлари мамлакат жанубидаги Бердянск аэродромига ҳужум уюштирганини эълон қилган.

Бундан ташқари, ижтимоий тармоқларда Бердянскда олингани айтилаётган фотосуратлар пайдо бўлиб, уларда ATACMS қисмларини кўриш мумкин.

Эслатиб ўтамиз, ўтган ойда Владимир Зеленский АҚШга борган ва Америка раҳбарияти билан учрашганди. Ўшанда Президент Жо Байдан  Американинг биринчи Abrams танклари тез орада Украинага етказилишини айтганди.