Ukraina dronlarining Belarusga uchirilishi javobsiz qolmaydi – Minsk

Belarus rasmiylari mamlakat hududiga Ukrainadan uchirilgan zarba beruvchi uchuvchisiz uchish apparatlarining hujumi javobsiz qolmasligini aytdi. Bu haqda Belarus Tashqi ishlar vazirligi xabar berdi.

Qayd etilishicha, dronlar davlat chegarasini buzganligi uchun mamlakat havo hujumidan mudofaa kuchlari tomonidan urib tushirilgan.

“Bu jinoiy harakatlar vaziyatni tubdan keskinlashtirib, mintaqamizdagi hozirgi mojaro zonasini kengaytirishga qaratilgan xavfli urinishdir. Ayni paytda inqirozni bartaraf etish ishlari olib borilmoqda”, deyilgan vazirlik bayonotida.

Vazirlik, shuningdek, bu borada Yevropa davlatlarini ham ogohlantirgan. Rasmiylarga ko‘ra, Ukrainaning hujumi to‘xtatilmasa, urush Yevropaning boshqa davlatlarini ham o‘z domiga tortib ketadi.

Eslatib o‘tamiz, Rossiyaning Kursk viloyatida ikki kundan beri janglar davom etmoqda. Ukraina kuchlarining mintaqaga kirib kelishi oqibatlarini bartaraf etish uchun mintaqada favqulodda holat joriy etilgani haqida xabar berilgandi.