Ugandada 16 kishi ochlikdan vafot etdi

Ugandaning Karamoja mintaqasida uzoq davom etgan qurg‘oqchilik hosilni butunlay nobud qilganidan keyin kamida 16 nafar mahalliy aholi vakili ochlikdan vafot etdi. Bu haqda mahalliy rasmiylarga tayanib, BBC xabar berdi.

Mintaqada an’anaviy tarzda ekish mavsumi boshlanadigan aprel oyidan beri deyarli yog‘ingarchilik bo‘lmagani sababli dehqonlar oziq-ovqatsiz qolgan. Qurg‘oqchilik makkajo‘xori, jo‘xori va soya ekinlarini nobud qilib, minglab oilalarni yashash vositalaridan mahrum etgan.

Mamlakat Bosh vaziri Robina Nabbanjaning ma’lum qilishicha, hukumat jabrlangan hududlar uchun zudlik bilan qo‘shimcha oziq-ovqat mahsulotlari sotib olishni rejalashtirmoqda va birinchi yordam aholiga yetib borishni boshlagan.

Ekspertlar mintaqada takrorlanayotgan gumanitar inqirozlarni iqlim o‘zgarishi, o‘rmonlarning kesilishi va chorva mollarining haddan tashqari ko‘p boqilishi bilan bog‘lamoqda.

Ma’lumot uchun, 2022 yilda ushbu hudud xuddi shunday og‘ir ochlikni boshdan kechirgan bo‘lib, o‘shanda 2200 dan ortiq kishi uning qurboniga aylangan.

Eslatib o‘tamiz, avvalroq oziq-ovqatning halokatli darajada yetishmovchiligidan aziyat chekayotgan insonlarning uchdan ikki qismi atigi 10 ta davlatda istiqomat qilayotgani haqida xabar berilgan edi. Ular: Afg‘oniston, Bangladesh, Kongo Demokratik Respublikasi, Myanma, Nigeriya, Pokiston, Janubiy Sudan, Sudan, Suriya va Yaman.