UEFA Superkubogi formati o‘zgartirildi

Yevropa futbol assotsiatsiyalari ittifoqi UEFA Superkubogi final o‘yini formatini o‘zgartirdi. Bu haqda “Mundo Deportivo” xabar berdi.

Manbaga ko‘ra, asosiy vaqtda durang qayd etilgan taqdirda, jamoalar har biri 15 daqiqadan iborat qo‘shimcha ikkita bo‘limda o‘ynash o‘rniga darhol penaltilar seriyasini boshlaydi.

2023 yilgi UEFA Superkubogi finalida o‘tgan mavsum Yevropa Chempionlar ligasida g‘olib chiqqan “Manchester Siti” va Yevropa Ligasining amaldagi g‘olibi “Sevilya” o‘ynaydi. Uchrashuv shu yilning 16 avgust kunida Gretsiyaning Pirey shahrida, “Karaiskakis” stadionida bo‘lib o‘tadi.

Germaniyaning “Ayntraxt” jamoasini mag‘lub etgan Ispaniyaning “Real” klubi UEFA Superkubogining amaldagi g‘olibi hisoblanadi.

Qayd etish joiz, aslida final o‘yini Rossiyaning Qozon shahrida bo‘lib o‘tishi kerak edi, ammo yanvar oyida Yevropa futbol assotsiatsiyalari ittifoqi uchrashuv joyini Gretsiyaga ko‘chirdi.