Turkmaniston Turkiyadan fuqarolari uchun viza rejimi joriy qilishni so‘radi

Turkmaniston hukumati Turkiyaga “Turkmaniston fuqarolari uchun turli toifadagi vizalar rejimini vaqtinchalik joriy etish iltimosi bilan” murojaat qildi. Bu haqda 3 sentyabr kuni Turkmaniston Tashqi ishlar vazirligi o‘z saytida ma’lum qildi.

Tashqi ishlar vazirligi bayonotida aytilishicha, vizalar “Turkmaniston fuqarolarining bo‘lish qoidalarini tizimli asosda takomillashtirish va saqlash maqsadida” joriy etilishi kerak. Ushbu qarorning sabablari haqida batafsil ma’lumot berilmagan.

“Biz amaliyotdan bilamizki, vaqtinchalikdan ko‘ra doimiyroq narsa yo‘q. Tashqi ishlar vazirligi Turkmaniston fuqarolari uchun viza rejimi qancha muddatga joriy etilishiga aniqlik kiritmayapti”, deya ta’kidlagan turkmen.news kuzatuvchisi.

COVID-19 pandemiyasidan oldin Turkiya Turkmaniston bilan bir vaqtda vizasiz rejim va to‘g‘ridan-to‘g‘ri reyslar amalga oshirgan dunyodagi yagona davlat edi. Shu sababli Turkiya Turkmaniston fuqarolari uchun eng mashhur mehnat migratsiyasi manziliga aylandi. 2020 yilning bahorida barcha davlatlar, jumladan Turkiya bilan muntazam reyslar to‘xtatildi. 

2022 yil avgust oyi boshida Turkmaniston fuqarolari Turkiyaga kiritilmadi va viza talab qilindi. Biroq Turkiya Tashqi ishlar vazirligi kirish rejimi o‘zgartirilganini rad etdi.