To‘qayev 71 yoshda. U tug‘ilgan kunini qanday o‘tkazadi?

Bugun, 17 may kuni Qozog‘iston Prezidenti Qosim-Jomart To‘qayev 71 yoshga to‘ldi. Davlat rahbarining matbuot xizmati Prezident bu kunni nishonlamasligini ma’lum qildi.

Prezident maslahatchisi va matbuot kotibi Berik Ualining aytishicha, davlat rahbari tug‘ilgan kunini nishonlamaydi.

“Qosim-Jomart To‘qayev uchun bu oddiy ish kuni. Prezident ish joyida bo‘ladi. Bu sana munosabati bilan hech qanday tadbir rejalashtirilmagan, ma’muriyat xodimlaridan tabriklashdan tiyilish so‘raladi”, deydi Berik Uali.

O‘tgan yili ham davlat rahbari 17 mayni odatdagidek o‘tkazgan.

Qayd etish joizki, bugun Malayziya Bosh vaziri Anvar Ibrohim Qozog‘istonga rasmiy tashrifini yakunladi va Qosim-Jomart To‘qayevning shaxsan o‘zi uni poytaxt aeroportida kuzatib qo‘ydi. O‘z navbatida, Anvar Ibrohim Qozog‘iston Prezidentiga samimiy qabul uchun minnatdorlik bildirib, tug‘ilgan kuni munosabati bilan ezgu tilaklar bildirdi va tort sovg‘a qildi.

Ma’lumot uchun, Qosim-Jomart To‘qayev 1953 yil 17 mayda Olmaota shahrida yozuvchi Kemel To‘qayev va Olmaota chet tillar pedagogika instituti xodimi Turar Shabarboyeva oilasida tug‘ilgan. U 1975 yilda Moskva davlat xalqaro munosabatlar institutini (MGIMO) tamomlagan, SSSRning Xitoy Xalq Respublikasidagi elchixonasida diplom oldi stajirovkasini tamomlagan, 1983-1984 yillarda Pekin tilshunoslik institutida amaliyot o‘tagan. 1992 yilda Rossiya Federatsiyasi Tashqi ishlar vazirligi Diplomatik akademiyasini tamomlagan.

Mehnat faoliyatini 1975 yilda SSSR Tashqi ishlar vazirligida boshlagan va Sovet Ittifoqining Singapur Respublikasidagi elchixonasiga ishga yuborilgan. 1979 yilda u SSSR Tashqi ishlar vazirligi apparatiga qaytgan. 1984-1985 yillarda SSSR Tashqi ishlar vazirligida ishlagan, keyin Xitoy Xalq Respublikasidagi Sovet elchixonasiga yuborilgan va 1991 yilgacha ikkinchi kotib, birinchi kotib va ​​maslahatchi lavozimlarida ishlagan.

1992 yilda Qosim-Jomart To‘qayev Qozog‘iston Respublikasi Tashqi ishlar vaziri o‘rinbosari etib tayinlangan. 1993 yilda Qozog‘iston Respublikasi Tashqi ishlar vazirining birinchi o‘rinbosari bo‘lgan. 1994 yilda Qozog‘iston Respublikasi Tashqi ishlar vaziri etib tayinlangan. 1999 yil mart oyida u Qozog‘iston Respublikasi Bosh vazirining o‘rinbosari bo‘ldi. 1999 yil oktyabr oyida parlament roziligi va Qozog‘iston Respublikasi Prezidentining Farmoni bilan Qozog‘iston Respublikasi Bosh vaziri etib tayinlandi. 2002 yil yanvar oyida u Qozog‘iston Respublikasi Davlat kotibi – Tashqi ishlar vaziri bo‘ldi. 2003 yildan 2007 yilgacha – Qozog‘iston Respublikasi Tashqi ishlar vaziri bo‘lgan To‘qayev 2007 yil yanvar oyida Qozog‘iston Respublikasi parlamenti Senati raisi etib saylangan. 2008 yilda Qozog‘iston parlamenti yuqori palatasi spikeri sifatida YeXHT Parlament Assambleyasi vitse-prezidenti etib saylangan.

2011 yil mart oyida u BMT Bosh kotibi o‘rinbosari, BMTning Jenevadagi bo‘limi bosh direktori, shuningdek, BMT Bosh kotibining Qurolsizlanish bo‘yicha konferensiyadagi shaxsiy vakili etib tayinlangan. Shuningdek, u Qurolsizlanish bo‘yicha konferensiya Bosh kotibi bo‘lib ishlagan. MDH va Shanxay hamkorlik tashkiloti Tashqi ishlar vazirlari kengashlari raisi etib saylangan.

To‘qayev 2013 yil 16 oktyabrda Qozog‘iston Respublikasi parlamenti Senati raisi etib qayta saylandi. 2019 yil 20 mart kuni u Qozog‘iston Respublikasi Prezidenti sifatida qasamyod qildi.

Eslatib o‘tamiz, avvalroq O‘zbekiston Respublikasi Prezidenti Shavkat Mirziyoyevning Qozog‘iston Respublikasi Prezidenti Qosim-Jomart To‘qayev bilan telefon orqali muloqoti bo‘lib o‘tdi. Mirziyoyev suhbatda Qozog‘iston Prezidentini tavallud kuni bilan chin yurakdan tabriklab, unga mustahkam sog‘lik, baxt-saodat va muvaffaqiyatlar, qardosh qozoq xalqiga tinchlik va ravnaq tilagan.