Tramp Ukraina masalasida Putinga qo‘ng‘iroq qildi

Joriy yilning 7 noyabr kuni AQSHning saylangan prezidenti Donald Tramp Rossiya Prezidenti Vladimir Putin bilan norasmiy telefon muloqoti o‘tkazdi va suhbat chog‘ida Rossiyaning Ukrainaga qarshi urushi mavzusini ko‘tardi. Bu haqda vaziyatdan xabardor manbalariga tayanib Amerikaning “The Washington Post” gazetasi kecha, 10 noyabr kuni xabar berdi.

Nashr manbalariga ko‘ra, amerikalik siyosatchining o‘zi Rossiya rahbariga Floridadagi kurortidan qo‘ng‘iroq qilgan. Suhbat chog‘ida Oq uyning sobiq rahbari Rossiya Prezidentiga Ukrainadagi urushning avj olishini davom ettirmaslikni maslahat bergan va unga Vashingtonning Yevropadagi muhim harbiy ishtirokini eslatgan.

Tramp, shuningdek, Vladimir Putin bilan urushni tezkor hal etishni muhokama qilish uchun keyingi aloqalarga qiziqish bildirgan. AQSHning yangi saylangan prezidenti ayrim bosib olingan hududlar ustidan Rossiya nazoratini saqlab qolishi variantini qo‘llab-quvvatlashini shaxsiy ravishda ochiq aytgan va bu masalani Putin bilan suhbatda ham ko‘targan.

Nashrning qayd etishicha, suhbat rasmiy bo‘lmagan – Trampning o‘tish davri jamoasi prezidentga AQSH Davlat departamenti ko‘magida qo‘ng‘iroq qilish imkonini beruvchi hujjatlarni hali imzolagani yo‘q. Bundan tashqari, Tramp o‘zining birinchi muddatidagi qo‘ng‘iroqlari stenogrammalari oshkor qilinganidan keyin hukumat amaldorlariga ishonmaydi.

Xuddi shu maqolada WP Ukraina rasmiylari Trampning Putinga qo‘ng‘iroq qilgani haqida xabardor qilinganini qayd etadi. Ismi oshkor etilmagan ikki manbaga ko‘ra, Kiyevda bu suhbatga e’tiroz bildirilmagan.

“Ukraina rasmiylari Tramp Putin bilan Ukraina masalasini diplomatik yo‘l bilan hal qilish bo‘yicha o‘zaro hamkorlik qilishini anchadan buyon tushunib yetdi”, deb yozadi nashr.

Ukraina Tashqi ishlar vazirligi WP nashriga javoban, nashr ma’lumotlari haqiqatga to‘g‘ri kelmasligini bildirgan.

“Ukraina tomonining taxminiy qo‘ng‘iroq haqida oldindan xabardor qilingani haqidagi xabarlar yolg‘on. Shunga ko‘ra, Ukraina bu chaqiruvni ma’qullay olmaydi yoki unga qarshi chiqa olmaydi”, degan vazirlikning rasmiy vakili Georgiy Tixiy “Reuters”ga bergan izohida.

Eslatib o‘tamiz, avvalroq Rossiya Prezidenti Vladimir Putin Sochidagi “Valday” xalqaro munozara klubining 21-yig‘ilishida respublikachi Donald Trampni AQSH prezidentlik saylovidagi g‘alabasi bilan omma oldida tabriklagandi. Putin, shuningdek, Trampning Rossiya bilan munosabatlarni tiklash va Ukraina inqirozini tugatishga yordam berish istagi haqidagi ommaviy bayonotlariga e’tibor qaratgandi. Tramp esa NBSʼga bergan intervyusida Putin bilan muzokaralarni qayta boshlashi mumkinligini ma’lum qilgandi.