Tramp Le Penga chiqarilgan sud hukmini “jodugar ovi” deb atadi 

AQSH Prezidenti Donald Tramp Fransiyaning “Milliy miting” partiyasi parlamentdagi fraksiyasi yetakchisi Marin Le Penga chiqarilgan sud hukmini jodugar oviga misol deb atadi va uni ozod qilishga chaqirdi. Bu haqda u Truth Social ijtimoiy tarmog‘ida yozgan.

“Marin Le Penga qarshi jodugar ovi Yevropa chapi qonundan so‘z erkinligini o‘chirish va siyosiy raqibini senzura qilish uchun qurol sifatida ishlatayotganining yana bir misolidir, bu safar raqibni qamoqqa olishgacha boradi”, dedi u.

Oq uy rahbari o‘tmishda uning o‘zi ham shunday siyosiy ta’qiblarga uchraganini ta’kidladi.

“Men Marin Le Penni bilmayman, lekin uning shuncha yillar davomida qanchalar mehnat qilganini qadrlayman. U yo‘qotishlarga uchradi, lekin davom etdi va hozir, katta yutuq bo‘lishidan oldin, ular uni ehtimol o‘zi ham bilmagan kichik ayblov – “buxgalteriya” xatosi uchun ushlashmoqda, deb o‘ylayman. Bularning barchasi Fransiya va buyuk fransuz xalqi uchun, ular qaysi tomonda bo‘lishidan qat’i nazar, juda yomon. Marin Le Penni ozod qiling”, deb yozdi Tramp.

Marin Le Penga chiqarilgan hukm

“Milliy miting” partiyasi parlament guruhi rahbari Marin Le Pen, partiyadan 8 deputat va 12 deputat yordamchisi qonun chiqaruvchi organ mablag‘larini o‘zlashtirganlikda aybdor deb topildi. Bu qaror Parijning axloq tuzatish mahkamasi tomonidan kecha, 31 mart kuni qabul qilingan. Le Pen to‘rt yillik qamoq jazosiga hukm qilingan, shulardan ikki yili shartli ravishda muddatidan ilgari bekor qilingan va u yana ikki yil davomida elektron bilaguzuk taqishga majbur bo‘ladi.

Bundan tashqari, unga besh yilga davlat lavozimlarida ishlash taqiqlangan. Biroq sudyalar hay’ati siyosatchining apellyatsiya shikoyati bo‘lishidan qat’i nazar, taqiq darhol kuchga kirishi haqida qaror chiqardi, bu Fransiyadagi standart sud amaliyotiga to‘g‘ri kelmaydi.

Ishda jami 27 kishi, jumladan, Milliy ittifoq rahbariyati ham ishtirok etgan. Siyosatchilar Yevropa Ittifoqi mablag‘larini suiiste’mol qilganlikda va Yevroparlament deputatlari yordamchilarini soxta yollash orqali partiyani yashirincha moliyalashtirganlikda ayblangan.

Hukmdan keyin Italiya Bosh vaziri o‘rinbosari Matteo Salvini, Vengriya Bosh vaziri Viktor Orban va Niderlandiyadagi hukmron koalitsiya tarkibiga kiruvchi o‘ng qanot “Ozodlik” partiyasi rahbari Gert Vilders Marin Le Penni qo‘llab-quvvatlashini bildirgan.