Toshkentdan Fukuok oroliga uchayotgan aviareys to‘xtatildi

Kecha, 21 fevral kuni soat 23:55 da Air Samarkand’ning Toshkent–Fukuok yo‘nalishidagi 9S-1021 reysi jo‘nashi rejalashtirilgan edi, biroq u texnik sabablarga ko‘ra kechiktirildi. Bu haqda aviakompaniya matbuot xizmati xabar berdi. 

Qayd etilishicha, ekipaj uchishni boshlash vaqtida shassining tebranishini sezib, xavfsizlik qoidalariga muvofiq, parvozni to‘xtatgan. Samolyot terminalga qaytarilib, muhandislar tomonidan batafsil tekshiruvdan o‘tkazilgan.

Tekshiruv natijasida muayyan detallarning almashtirilishi zarurligi aniqlangan va hozirda ushbu ishlar amalga oshirilmoqda. Nosozlik bartaraf etilgach, samolyot qo‘shimcha tekshiruvdan o‘tkazilishi aytilgan. 

Aviatsiya qoidalariga muvofiq, yo‘lovchilar mehmonxonaga joylashtirilgan. Taxminiy jo‘nash vaqti – bugun, 22 fevral kuni mahalliy vaqt bilan soat 22:00 da amalga oshiriladi.

Ma’lumot uchun, Fukuok bu Vetnamning janubi-g‘arbiy qismida joylashgan orol va tuman. U Vetnamning eng katta oroli va mamlakatning eng muhim turistik markazlaridan biri hisoblanadi.

Eslatib o‘tamiz, avvalroq Air Samarkand’ning UZS4003 Toshkent – Jidda reysi bortida yuzaga kelgan favqulodda tibbiy holat sababli Bahrayn aeroportiga majburiy qo‘nishni amalga oshirgandi. Parvoz davomida 75 yoshli yo‘lovchida takroriy infarkt sodir bo‘lgan. Samolyot bortida bo‘lgan shifokor bemorning hayoti xavf ostida ekanini tasdiqlagan.