Тошкентдан Фукуок оролига учаётган авиарейс тўхтатилди

Кеча, 21 февраль куни соат 23:55 да Air Samarkand’нинг Тошкент–Фукуок йўналишидаги 9S-1021 рейси жўнаши режалаштирилган эди, бироқ у техник сабабларга кўра кечиктирилди. Бу ҳақда авиакомпания матбуот хизмати хабар берди. 

Қайд этилишича, экипаж учишни бошлаш вақтида шассининг тебранишини сезиб, хавфсизлик қоидаларига мувофиқ, парвозни тўхтатган. Самолёт терминалга қайтарилиб, муҳандислар томонидан батафсил текширувдан ўтказилган.

Текширув натижасида муайян деталларнинг алмаштирилиши зарурлиги аниқланган ва ҳозирда ушбу ишлар амалга оширилмоқда. Носозлик бартараф этилгач, самолёт қўшимча текширувдан ўтказилиши айтилган. 

Авиация қоидаларига мувофиқ, йўловчилар меҳмонхонага жойлаштирилган. Тахминий жўнаш вақти – бугун, 22 февраль куни маҳаллий вақт билан соат 22:00 да амалга оширилади.

Маълумот учун, Фукуок бу Вьетнамнинг жануби-ғарбий қисмида жойлашган орол ва туман. У Вьетнамнинг энг катта ороли ва мамлакатнинг энг муҳим туристик марказларидан бири ҳисобланади.

Эслатиб ўтамиз, аввалроқ Air Samarkand’нинг UZS4003 Тошкент – Жидда рейси бортида юзага келган фавқулодда тиббий ҳолат сабабли Баҳрайн аэропортига мажбурий қўнишни амалга оширганди. Парвоз давомида 75 ёшли йўловчида такрорий инфаркт содир бўлган. Самолёт бортида бўлган шифокор беморнинг ҳаёти хавф остида эканини тасдиқлаган.