Самолёт полининг остидан илон топилиб, парвоз бекор қилинди

Японияда самолёт салонидан 40 сантиметр узунликдаги заҳарсиз илон топилиши сабабли парвоз бекор қилинди. Бу ҳақда “The Independent” нашри хабар берди.

Қайд этилишича, жорий йилнинг 19 октябрь куни Japan Airlines авиакомпаниялар гуруҳига кирувчи Japan Air Commuter самолёти Симане префектурасидаги Идзумо аэропортидан Фукуокага борган. У маҳаллий вақт билан соат 12:50 да Кагосима префектурасига учиши керак бўлган.

Бироқ самолёт парвозга тайёрланаётган вақтда механик унинг пол қопламаси остидан илонни топган. Шу сабабли рейс бекор қилинган.

Маълумотларга кўра, илон заҳарсиз бўлган. Уни тутиш учун ёввойи ҳайвонларни назорат қилиш бўйича мутахассис чақирилган ва судралиб юрувчи тахминан 24 соатдан кейин ушланган.

Авиакомпания илон самолётга ташқаридан кирган бўлиши мумкинлигини тахмин қилган. Бироқ унинг бортга қандай кириб қолгани ҳозирча аниқланмаган.

“Биз аниқлашимизча, самолёт салонига илон кириб қолиши билан боғлиқ бундай ҳолат илгари кузатилмаган”, дейилади компания баёнотида.

Авиакомпания йўловчилардан юзага келган ноқулайлик учун узр сўраган.

Билдирилишича, бу Japan Air Commuter авиакомпаниясида қайд этилган илк шундай ҳодиса ҳисобланади.

Эслатиб ўтамиз, аввалроқ Токиодаги Ханеда аэропортида Мексикадан Жанубий Корея орқали келган 23 ёшли эркакнинг юкидан 200 га яқин калтакесак топилгани ҳақида хабар берилган эди.