Toshkentdagi sexga o‘t ketdi (video)

Ijtimoiy tarmoqlarda Toshkent viloyatining Toshkent tumanida joylashgan sexda yong‘in bo‘layotganligi aks etgan video tarqaldi. Holat yuzasidan viloyat Favqulodda vaziyatlar boshqarmasi ma’lumot berdi.

Qayd etilishicha, yong‘in bugun, 22 noyabr kuni soat 11:43 atrofida Toshkent tumanining “Obodlik” MFY Oybek ko‘chasida joylashgan MCHJning biriga qarashli binoda sodir bo‘lgan.

Voqea sodir bo‘lgan joyga zudlik bilan Toshkent viloyati Favqulodda vaziyatlar boshqarmasiga qarashli 7 ta yong‘in o‘chirish ekipajlari jalb qilingan. Ekipajlar yong‘in joyiga soat 11:50 da yetib borib, soat 13:30 da yong‘in to‘liq o‘chirilgan.

Bildirilishicha, hozirda sodir bo‘lgan yong‘inning kelib chiqishi sababini aniqlash bo‘yicha surishtiruv ishlari olib borilmoqda. Hodisa oqibatida tan jarohati olgan va vafot etganlar yo‘q.

Eslatib o‘tamiz, avvalroq Xorazm viloyatining Urganch tumanida joylashgan bozorlardan birida yong‘in sodir bo‘lgandi.