“Qishloqlardan poytaxtga salom”. Toshkentdagi metro bekatlarida “svet” o‘chib qoldi

Jamiyat

image

Toshkent metropolitenidagi nosozliklar “chelenj”i davom etadi. Bu safar Toshkent metrosi bekatlarida elektr energiyasi uzilib qoldi.

Ijtimoiy tarmoqlarda bir qancha bekatlardan foto va video tarqaldi.

“Toshkent metropoliteni”ning ma’lum qilishicha, bugun, soat 12:55 – 13:05 oralig‘ida Toshkent shahar elektr ta’minoti tizimida yuzaga kelgan nosozlik sababli metropolitenining “Chilonzor”, “Yunusobod”, “O‘zbekiston” yo‘nalishlaridagi bekatlarida yorituvchi uskunalar ishlamagan, ekskalatorlar to‘xtagan.

“Poyezdlar harakati to‘xtamagan, chunki poyezdlarning harakatini ta’minlovchi elektr ta’minoti alohida. Keltirilgan noqulayliklar uchun uzr so‘raymiz”, deyiladi izohda.

Metro voqealari

Qayd etish kerakki, joriy yilning aprel oyida Toshkent metropoliteni tez-tez ijtimoiy tarmoqlarda muhokamalarga sabab bo‘ldi.

Eslatib o‘tamiz, avvalroq Toshkent metropolitenining Chilonzor yo‘nalishidagi “Novza” bekatida poyezd to‘xtab qolgani haqida xabar berilgandi.

7 aprelda O‘zbekiston yo‘nalishining “G‘afur G‘ulom” bekatida texnik sabablarga ko‘ra yo‘lovchilar zaxiradagi poyezdga ko‘chirilgan. Bu holat ijtimoiy tarmoqlarda metroda poyezdlar to‘qnashib ketdi, deya talqin qilingandi.

8 aprel kuni Sergeli yo‘nalishida metro poyezdi harakati to‘xtab qolgandi. Yo‘lovchilar esa evakuatsi qilingan. 10 aprel kuni esa eng sharmandali va xavfli holat yuz berdi. Poyezd Chilonzor yo‘nalishidagi “Pushkin” va “Buyuk ipak yo‘li” bekatlari oralig‘ida eshiklarini yopmasdan harakatlandi. Bu vaqtda vagonda yo‘lovchilar bo‘lgan, albatta.

Keyinchalik Toshkent metrosidagi tabloda behayo yozuv paydo bo‘ldi. Joriy yilning 21 may kuni Toshkentda yerusti metro bekati tomidagi qoplamalar shamolda uchib tushdi.

Shuningdek, Toshkent halqa yo‘li metropolitenida olib borilgan qurilish ishlarida 899 million so‘m mablag‘ talon-toroj qilingani ma’lum bo‘ldi.


Maqola muallifi

Teglar

Baholaganlar

55

Reyting

2.9

Maqolaga baho bering

Doʻstlaringiz bilan ulashing