Toshkentda yosh qizga hujum qilgan erkak ushlandi

Avvalroq Toshkent shahri Mirzo Ulug‘bek tumanida noma’lum shaxs pod’ezdga kirib ketayotgan qizga hujum qilgani haqida xabar bergan edik. Mazkur jinoyatda gumon qilinayotgan shaxs IIO xodimlari tomonidan qo‘lga olindi. Bu haqda QALAMPIR.UZ’ga Toshkent shahar IIBB axborot xizmati boshlig‘i Nilufar Isoxonova xabar berdi.

Ma’lum qilinishicha, kecha, 4 sentyabr kuni soat 15:20 da Toshkent shahri Mirzo Ulug‘bek tumanidagi ko‘p qavatli uylarning birida yashovchi qiz o‘z pod’ezdiga kirib ketayotganida noma’lum yigit unga orqadan hujum qilgan hamda uni majburlab shaxsiy ehtiyojini qondirmoqchi bo‘lgan. Baland ovozlarni eshitgan qo‘shni uydagilar yugurib chiqqan vaqtda yigit qochib ketgan. 

Bugun, 5 sentyabr kuni Toshkent shahar IIBB xodimlari tomonidan o‘tkazilgan tezkor tadbirlar natijasida ushbu jinoyatni sodir etishda gumon qilingan shaxs qo‘lga olingan. Boshqarmaning aniqlik kiritishicha, mazkur jinoyatni 1994 yilda tug‘ilgan A.Y. sodir etgan. Hozirda holat yuzasidan tergovga qadar tekshiruv olib borilmoqda.

Eslatib o‘tamiz, shu yilning 19 aprel kuni Mirobod tumani Inoqobod ko‘chasida noma’lum shaxs 17 yoshli qizning orqasidan kelib, tegajog‘lik qilgandi. So‘ngra hodisa joyidan qochib yashiringan. Keyinchalik qizning otasi uning stressdaligini ma’lum qilgan. 

Ushbu holat yuzasidan qo‘zg‘atilgan jinoyat ishi Jinoyat ishlari bo‘yicha Mirobod tumani sudida joriy yilning 8 avgust kuni ko‘rib chiqilib, O.O. Jinoyat kodeksining 25,118-moddasi (nomusga tegishga suiqasd qilish) 3-qismi “a” bandida nazarda tutilgan jinoyatni sodir etganlikda aybli deb topilib, unga 10 yil muddatga ozodlikdan mahrum qilish jazosi tayinlangan edi.