Toshkentda Lacetti avtobus bilan to‘qnashdi

Toshkent shahri Chilonzor tumanida yengil mashina va avtobus o‘rtasida yo‘l-transport hodisasi sodir bo‘ldi. Bu haqda “Toshshahartransxizmat” xabar berdi.

Hodisa bugun, 19 noyabr kuni soat 06:40 atrofida Bunyodkor-Qatortol 2 ko‘chalari kesishgan chorrahada sodir bo‘lgan.

Qayd etilishicha, Chilonzor tumanida Lacetti avtomobili 171-sonli avtobus bilan to‘qnashib ketgan. Hodisa oqibatida mashinada bo‘lgan yo‘lovchi shifoxonaga olib ketilgan, avtobusda bo‘lgan 3 nafar yo‘lovchiga jarohat yetmagan.

“Haydovchi Q.M. boshqaruvida bo‘lgan 171-sonli yo‘lovchi avtobus 2-darajali yo‘l bo‘ylab harakatlanib borayotgan vaqtida Lacetti haydovchisi M.Sh. asosiy yo‘lda svetoforning yashil chirog‘ida harakatlanib kelayotgan avtobusga yo‘l bermasdan uning yo‘liga chiqib ketgan va to‘qnashgan”, deyiladi xabarda.

YTH oqibatida yengil mashinadagi 66 yoshli yo‘lovchi D.M. birinchi tibbiy yordam ko‘rsatish maqsadida shifoxonaga olib ketilgan.

Ikkala transport vositasi ham texnik shikastlangan. Holat yuzasidan surishtiruv ishlari olib borilmoqda.

Eslatib o‘tamiz, avvalroq Samarqand viloyatida avtobus voyaga yetmagan piyodani urib yuborgandi. YTH oqibatida piyoda voqea joyida vafot etgan. Holat yuzasidan Samarqand shahri bo‘yicha IIO FMB huzuridagi TB tomonidan Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilib, haydovchi Jinoyat protsessual kodeksining 221-moddasi tartibida ushlangan.

Muhammad Hodiyev