Toshkentda kuchli ta’sir qiluvchi dorilarni qadoqlab sotgan jinoiy guruh ushlandi

Toshkent shahrida katta miqdordagi kuchli ta’sir qiluvchi dori vositalarini qadoqlab sotish bilan shug‘ullanib kelayotgan jinoiy guruh faoliyatiga chek qo‘yildi. Bu haqda Ichki ishlar vazirligi matbuot xizmati xabar berdi.

Bildirilishicha, IIV Tezkor-qidiruv departamenti va DXX xodimlari tomonidan o‘tkazilgan tadbirda 1994 hamda 1997 yilda tug‘ilgan shaxslar yirik miqdorda kuchli ta’sir qiluvchi dori vositalarini qadoqlab, zakladka” usulida tarqatish bilan shug‘ullanayotgani ma’lum bo‘lgan. Ushbu ikki nafar shaxs Mirzo Ulug‘bek tumani hududida to‘xtatilib tekshirilganda, ularning yonida 300 dona “Pregabalin” va 8 dona “Tropikamid” kuchli ta’sir qiluvchi dori vositalari borligi aniqlangan.

Tadbir davomida qo‘lga olingan shaxslardan birining yashash manzilida tarqatish uchun tayyorlab qo‘yilgan va qadoqlash uchun saqlab kelinayotgan dori vositalari, flakonlar, bo‘sh kapsulalar, elektron tarozilar hamda dori vositalarini qadoqlash maqsadida turli aralashtirish moslamalari borligi aniqlanib, ashyoviy dalil sifatida olingan.

Shuningdek, qo‘lga olingan shaxsga tegishli Spark rusumli avtomashina yukxonasida 12 dona kir yuvish kukuni qadog‘iga yashirilgan 36 kilogramm va yelim idishda 1,5 kilogramm “Pregabalin”,  2700 dona qadoqlangan “Pregabalin” dori vositasi va bo‘sh kapsulalari borligi aniqlangan.

“O‘tkazilgan tezkor tadbir davomida umumiy narxi 35 mlrd 692 mln so‘mlik jami 42 kg 806 gramm kuchli ta’sir qiluvchi dori vositalari savdosiga chek qo‘yildi. Hozirda holat yuzasidan jinoyat ishi qo‘zg‘atilib, tergov harakatlari olib borilmoqda”, deyiladi xabarda.

Eslatib o‘tamiz, oldinroq Toshkentda narkolaboratoriya tashkil qilgan shaxslar ushlangandi.

Maftuna Madaminova