Toshkent-Termiz xalqaro avtomobil yo‘lida 7 ta mashina to‘qnashdi. Qurbonlar bor

M-39 Toshkent-Termiz xalqaro avtomobil yo‘lining Jizzax viloyati hududidan o‘tgan qismida yettita transport vositasi ishtirokida yo‘l-transport hodisasi sodir bo‘ldi va oqibatda ikki kishi vafot etdi. Bu haqda Jizzax viloyat IIB axborot xizmati xabar berdi.

Voqea joriy yil 30 iyun kuni soat 10:50 lar atrofida Toshkent – Termiz M-39 yo‘lining 997- kilometrida (Jizzax viloyatining Sharof Rashidov tumaniga to‘g‘ri keladi) sodir bo‘lgan. Dastlab Buxoro viloyatida yashovchi shaxs boshqaruvidagi Chakman rusumidagi mashina shu yo‘nalishda harakatlanayotgan Samarqand viloyatida istiqomat qiluvchi haydovchi boshqaruvidagi Epica’ning orqasidan urilgan. Oqibatda Epica ichidagi yo‘lovchi, Payariq tumani Imom Buxoriy mahallasida yashovchi fuqaro voqea joyida vafot etgan. Mazkur avtoulov ichida bo‘lgan yana bir yo‘lovchi, Xorazm viloyati Xiva tumani Juryon mahallasida istiqomat qiluvchi fuqaro shifoxonaga yotqizilgan. Biroq u ham ko‘rsatilgan muolajalarga qaramay vafot etgan.  

Bundan tashqari, ushbu yo‘l-transport hodisasi oqibatida Toshkent shahri, Jizzax, Buxoro, Qashqadaryo viloyatlarida yashovchi shaxslar boshqaruvidagi Lacetti, Sinotruk, Howo, Cobalt, Nexia-3 avtomashinalari ham to‘qnashgan. Mazkur avtoulovlarga turli darajada texnik shikast yetgan, ulardagi haydovchi va yo‘lovchilar jabrlanmagan. 

Bildirilishicha, hozirda holat yuzasidan tegishli tartibda jinoyat ishi qo‘zg‘atilib, tergov harakatlari olib borilmoqda.

Shu o‘rinda aytish joizki, ayni paytda Jizzax shahrini G‘allaorol tumani va boshqa viloyatlar bilan bog‘lovchi Uchtepa – Jizzax 4R-38 yo‘lining 34-35 kilometrlari oralig‘ida Sangzor daryosi ustidagi ko‘prik ta’mirlanyapti. Shuningdek, mazkur yo‘lning 33-kilometrida yo‘l o‘tkazgich qurilmoqda. Mazkur jihat 4R-38 yo‘lida avtotarnsport vositalari harakatining cheklanishiga sabab bo‘lgan. Bu esa Toshkent – Termiz M-39 yo‘lining 981 va 1012- kilometrlari oralig‘ida avtoulovlar harakatining sezilarli darajada ortishiga olib kelgan.