Toshkent teleminorasi qarshisida Toyota, Malibu va Cobalt to‘qnashib ketdi

Toshkent shahar Yunusobod tumanida Toyota, Malibu-2 va Cobalt ishtirokida yo‘l-transport hodisasi yuz berdi. Oqibatda Malibu-2 yo‘lovchisi va haydovchisiga birinchi tibbiy yordam ko‘rsatilgan. Bu haqda Toshkent shahar IIBB YHXB xabar berdi.

Qayd etilishicha, kecha, 17 noyabr kuni soat 21:30 larda Toshkent shahar Yunusobod tumani Amir Temur ko‘chasi Toshkent teleminorasi qarshisida haydovchi N.S. boshqaruvidagi Toyota rusumli, O.Sh. boshqaruvidagi Malibu-2 hamda A.I. boshqaruvidagi Cobalt rusumli transport vositalari ishtirokida yo‘l-transport hodisasi sodir bo‘lgan.

YTH oqibatida Malibu transport vositasining yo‘lovchisi va haydovchisiga birinchi tibbiy yordam ko‘rsatilgan.

Mazkur holat yuzasidan Toshkent shahar IIBB YHXB ma’sul xodimlari tomonidan surishtiruv ishlari olib borilmoqda.

“Barcha yo‘l harakati qatnashchilaridan qoidalarga rioya qilishlarini, tezlikni belgilangan me’yorlardan oshirmasligini so‘raymiz”, deyiladi xabarda.

Eslatib o‘tamiz, avvalroq Toshkent shahar Yakkasaroy tumanida 20 yoshli yigit Malibu-2 ni yo‘l chetidagi temir ustunga borib urgan edi.