“Tolibon” vakillari o‘zini tanitish va tan oldirish uchun Jenevaga bordi

Afg‘onistonning “Tolibon” harakati delegatsiyasi 6 fevraldan buyon Yevropa davlati hukumatining yuqori martabali vakillari bilan muzokaralar o‘tkazish uchun Shveysariyada bo‘lib turibdi. Bu haqda  Shveysariya TIV xabar bermoqda. 

Tashrif dasturidan “Tolibon” harakatining xalqaro tashkilotlar vakillari bilan uchrashuvi ham o‘rin olgan.  

“Tolibon” delegatsiyasi Shveysariyaning “Geneva Call” nodavlat tashkiloti taklifiga binoan ushbu mamlakatga tashrif buyurgan.  

Muzokaralar 11 fevralgacha davom etishi kutilmoqda. 

Tomonlar “Tolibon” muvaqqat hukumatining qonuniyligi va tan olinishi masalalarini muhokama qiladi. 

Ayni paytda Afg‘onistondagi gumanitar vaziyat og‘irlashib bormoqda. 

“Tolibon”ga gumanitar yordam ko‘rsatish masalasi Jenevada Xalqaro Qizil Xoch qo‘mitasi va boshqa gumanitar tashkilotlar vakillari bilan muhokama qilinadi. 

“Tolibon” delegatsiyasi Jenevaga tashrifi oldidan Norvegiya poytaxti Osloda bo‘lib, u yerda AQSH va Yevropa Ittifoqiga a’zo davlatlar vakillari bilan uchrashgan. 

Eslatib o‘tamiz, avvalroq O‘zbekiston Respublikasi Tashqi ishlar vaziri “Tolibon” xalqaro hamjamiyat qo‘yayotgan talablarni bajarishi shartligini ma’lum qilgandi. 

Ma’lumot o‘rnida, 2021 yil avgust oyi boshida “Tolibon” afg‘on hukumat kuchlariga qarshi hujumni kuchaytirdi. Harakat 15 avgust kuni Qobulga kirib keldi va ertasi kuni urush tugaganini e’lon qildi. Avgust oyining so‘nggi ikki haftasida AQSH harbiylari himoyasida bo‘lgan Qobul aeroportidan G‘arb fuqarolari va ular bilan hamkorlik qilgan afg‘onlar ommaviy evakuatsiya qilindi. 31 avgustga o‘tar kechasi amerikalik harbiylar Qobul aeroportini tark etib, AQSHning Afg‘onistondagi qariyb 20 yillik harbiy faoliyatiga yakun yasadi. Sentyabr oyi boshida Afg‘oniston muvaqqat hukumati tarkibi e’lon qilindi, unga “Tolibon”ning birinchi hukmronligi davrida tashqi siyosatga mas’ul bo‘lgan va 2001 yildan beri BMT sanksiyalari ostida qolayotgan Muhammad Hasan Oxund rahbar bo‘ldi.