TIV qurolli mojarolar hududidan qaytarilgan o‘zbekistonliklar bo‘yicha ma’lumot berdi

Avvalroq, O‘zbekiston Respublikasi Prezidenti Shavkat Mirziyoyev topshirig‘iga binoan 156 nafar O‘zbekiston fuqarolari, asosan ayollar va bolalar maxsus aviareysda Toshkent shahriga olib kelingani haqida xabar bergan edik.

O‘zbekiston Respublikasi Tashqi ishlar vazirligi bergan bayonotda qayd etilishicha, ular aldov yo‘llari bilan Yaqin Sharqdagi qurolli mojarolar hududiga borib qolgan.

Ushbu gumanitar amaliyot inson huquqlarini himoya qilish sohasidagi asosiy xalqaro hujjatlarga to‘liq rioya etgan holda,  shuningdek,  xalqaro gumanitar huquqning me’yor va tamoyillaridan kelib chiqib amalga oshirildi. 

Xorijiy jangari-terroristlarlar bilan aloqador hamda terrorizm qurbonlari bo‘lishi mumkin bo‘lgan ayollar va bolalarga yordam ko‘rsatish muhimligi BMT Xavfsizlik kengashining 2396-rezolyutsiyasi bilan tasdiqlangan. 

“Og‘ir hayotiy davrni boshdan o‘tkazib,  Vatanga qaytgan hamyurtlarimizga O‘zbekiston Hukumati reabilitatsiya va jamiyatga qayta moslashishlari uchun har tomonlama yordam ko‘rsatadi.  Ularning tibbiy yordam va psixosotsial ko‘makdan foydalanishlari,  ta’lim va boshqa ijtimoiy dasturlarda ishtirok etishlari ta’minlanadi.  Qutqarilgan vatandoshlarimizning tinch hayotga qaytishlari uchun,  xususan ularni tegishli boshpana va ish o‘rni bilan ta’minlash borasida zarur sharoitlar yaratiladi”, deyiladi TIV xabarida.

Barcha musulmonlar uchun muqaddas bo‘lgan Ramazon oyida fuqarolarni qutqarish bo‘yicha muvaffaqiyatli amalga oshirilgan gumanitar missiya O‘zbekiston Tashqi ishlar vazirligi, maxsus xizmatlar va boshqa idoralarning muvofiqlashtirilgan harakatlari samarasidir. 

Qator xorijiy davlatlar va xalqaro tashkilotlar,  jumladan Xalqaro Qizil xoch qo‘mitasi va YUNISEF tomonidan muhim ko‘mak ko‘rsatilgan. O‘zbekiston tomoni mazkur tadbirda ishtirok etgan barcha hamkorlariga fuqarolarning Vatanga eson-omon qaytarishda ko‘rsatgan yordami uchun minnatdorchilik izhor etdi. 

“Turli sabablarga ko‘ra begona yurtlarda og‘ir hayotiy vaziyatga tushib qolgan vatandoshlarimizga ularning barchasi O‘zbekiston Respublikasi himoyasida ekanliklarini,  davlat ularning huquq va manfaatlarini himoya qilish uchun barcha choralarni qo‘llashini ma’lum qilishni muhim deb hisoblaymiz”, deb yakunlanadi TIV bayonoti.