Termizda uchta avtomobil to‘qnashuvida bir odam yonib ketdi

Kecha, 3 aprel kuni soat taxminan 20:55 larda Termiz shahrida uchta avtomobil ishtirokida yo‘l-transport hodisasi sodir bo‘ldi. Bu haqda viloyat YHXB xabar berdi.

Shaharning At-Termiziy ko‘chasida haydovchi 1998 yilda tug‘ilgan S.M. boshqaruvida bo‘lgan Toyota rusumli miniven, 1995 yilda tug‘ilgan Sh.M. boshqaruvida bo‘lgan Nexia 3 hamda 1992 yilda tug‘ilgan haydovchi B.Sh. boshqaruvidagi Cobalt rusumli avtomobillar ishtirokida to‘qnashuv sodir bo‘lgan. 

To‘qnashuv oqibatida Cobalt rusumli avtomobilda yong‘in yuzaga kelgan. Holat haqidagi ma’lumot Surxondaryo viloyati FVBga soat 21:00 da xabar berilgan va o‘t o‘chiruvchilar tomonidan 21:11 yong‘in bartaraf etilgan.

Haydovchilarga birinchi tez tibbiy yordam ko‘rsatilgan. Cobalt rusumli avtomashinada yo‘lovchi sifatida ketayotgan 1985 yilda tug‘ilgan fuqaro B.J yong‘in natijasida halok bo‘lgan.

Hozirda ushbu YTH yuzasidan Termiz shahar IIO FMB tergov bo‘limi tomonidan tergovga qadar surishtiruv ishlari olib borilmoqda.