Sudanda 600 mingdan ortiq odam ochlikdan aziyat chekmoqda

Fuqarolar urushi sodir bo‘layotgan Afrikaning shimoli-sharqida joylashgan Sudan davlatida 600 mingdan ortiq odam ochlikdan aziyat chekmoqda. Bu haqda “Bild” nashri xabar berdi.

BMTning Oziq-ovqat va qishloq xo‘jaligi tashkiloti (FAO) va UNICEF ma’lumotlariga ko‘ra, ochlikdan azob chekayotganlar soni taxminan 638 ming kishini tashkil etadi. Hatto ochlik aholini o‘limgacha olib bormoqda.

“Odamlar tobora zaiflashib bormoqda va oqibatda vafot etmoqda, chunki ular bir necha oy davomida oziq-ovqatsiz kunini o‘tkazishga majbur”, deydi FAO eksperti Jan-Martin Bauer.

Hozirgi vaqtda oziq-ovqat yetishmovchiligi 24 million kishiga ta’sir qilmoqda, bu esa Sudanning aholisining yarmidan ko‘prog‘ini tashkil etadi.

“BMTda ochlik bu oziq-ovqat inqirozining og‘ir shakli deb ta’riflanadi, bunda 20% dan ortiq xonadonlar oziq-ovqat yetishmovchiligidan aziyat chekadi va har kuni ochlikdan o‘lim holatlari kuzatiladi, ya’ni 10 ming kishiga kamida ikki nafar kattadan yoki to‘rt boladan o‘lim ro‘y beradi. Sudan so‘nggi 15 yil ichida ochlik e’lon qilingan uchinchi mamlakatdir (Janubiy Sudan va Somalidanoq so‘ng)”, deyiladi xabarda.

Ma’lumot uchun, ochlikning asosiy sababi — fuqarolik urushi. 2023 yilning aprelidan boshlab Sudanda hokimiyat uchun – mamlakatning rahbari Abdul-Fattah al-Burhan va uning sobiq o‘rinbosari Muhammad Hamdan Daglo o‘rtasida qonli urush davom etmoqda. So‘nggi 20 oy ichida bu urush dunyodagi eng katta gumanitar falokatlardan biriga aylangan, ammo xalqaro hamjamiyat unga oz e’tibor bermoqda. Hozirgi vaqtga qadar 24 mingdan ortiq odam halok bo‘ldi, 13 milliondan ortiq odam qochqinlarga aylandi, ulardan 3,2 millioni qo‘shni davlatlarga: Chad, Misr va Janubiy Sudanga qochib ketgan.