SSV koronavirusdan vafot etgan tibbiyot xodimi haqida ma’lumot berdi

Avvalroq, Olmazor tumanidagi 18-Oilaviy poliklinikasining katta hamshirasi 1960 yilda tug‘ilgan Feruza To‘xtayeva koronavirusdan vafot etgani haqida xabar bergan edik. Sog‘liqni saqlash vazirligi tibbiyot xodimining o‘limi haqida ma’lumot berdi va  rasmiy e’lon qilingan o‘lim holatlari 88 taga yetdi.

Vazirlik ma’lumotiga ko‘ra, Toshkent shahri Olmazor tumanida yashagan 60 yoshli F.T. (ayol)da joriy yil 8 iyul kuni “COVID-19” tasdiqlangan va u Virusologiya ilmiy-tekshirish instituti klinikasiga yotqizilgan.

Unga “COVID-19” infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan. Bemorda kasallik sepsis, o‘tkir nafas va yurak qon-tomir yetishmovchiligi, poliorgan yetishmovchilik kabi asoratlar bilan kechgan. 

Shuningdek, u yurak ishemik kasalligi, zo‘riqish stenokardiya, qandli diabet kabi hamroh xastaliklar bilan ham og‘rigan.

Shifoxonada bemorning davolanishi davomida shifokorlar tomonidan onlayn konsultatsiya va konsiliumlar qilingan, davolash jarayoni mutaxassislar tavsiyasi asosida olib borilgan. 

Biroq shifokorlar tomonidan standartlar asosida o‘tkazilgan reanimatsion muolajalarga qaramasdan bemorning ahvoli keskin og‘irlashib, o‘tkir nafas va yurak qon-tomir yetishmovchiligidan vafot etgan.