Sobiq Eron shohining surgundagi o‘g‘li madad istab Isroilga bormoqchi

1979 yilgi islom inqilobida ag‘darilgan Eron shohining surgundagi o‘g‘li Rizo Pahlaviy shu haftada Isroilga boradi. Bu haqda “Reuters” xabar berdi.

Kecha, 16 aprel kuni Isroil hukumati Rizo Pahlaviyni Isroilga keladigan eng yuqori martabali eronlik deb atagan.
Isroil o‘z bayonotida Pahlaviyning tashrifidan Isroil va Eron xalqi o‘rtasida ko‘prik yaratish va Oyatulloh rejimiga birgalikda qarshilik ko‘rsatish maqsad qilinganini bildirgan.

“Demokratik Eron Isroil va bizning arab qo‘shnilarimiz bilan aloqalarini yangilashga intiladi. Nazarimda, o‘sha kun har qachongidan ham yaqinroq”, degan Rizo Pahlaviy

Tashrif davomida Pahlaviy Isroilning Xolokostni yodga olish marosimida ishtirok etadi.

Ma’lumot uchun, Isroil va Eron AQSH tomonidan qo‘llab-quvvatlangan Shoh Muhammad Rizo Pahlaviy davrida iliqroq aloqalarga ega bo‘lgan. Biroq 1979 yilgi inqilobdan so‘ng ikki davlat ashaddiy dushmanga aylangan.