Shimoliy Koreya Yaponiya dengiziga 2 ta raketa uchirdi

Joriy yilning 20 sentyabr kuni Shimoliy Koreya mamlakatning sharqiy sohillari yaqinidan dengizga ikkita raketa uchirdi. Janubiy Koreya Mudofaa vazirligi ma’lumotiga ko‘ra, ulardan kamida biri ballistik raketa bo‘lgan. Bu haqda “Reuters” xabar berdi.

Ushbu voqea 16 sentyabr kuni, ya’ni Shimoliy Koreya Pxenyan o‘zining yadroviy davlat maqomini yana bir bor tasdiqlaganidan bir necha kun o‘tib sodir bo‘lgan. Mamlakat hukumati Birlashgan Millatlar Tashkilotining Shimoliy Koreyani yadroviy faoliyatini to‘xtatishga chaqiruvchi rezolyutsiyasini ham rad etgan.

Janubiy Koreya harbiylari ma’lumotiga ko‘ra, 20 sentyabr kuni soat 15:00 atrofida Vonsan shahri yaqinidan birinchi raketa uchirilgan. Ballistik raketa 450 kilometr masofani bosib o‘tib, Yaponiya dengizi hududiga tushgan.

Ikkinchi raketa esa 20 sentyabr kuni soat 18:00 dan biroz keyin uchirilgan. Janubiy Koreya Mudofaa vazirligi voqeani tasdiqlagan, biroq dastlab uning parvoz masofasi va boshqa texnik xususiyatlari haqida ma’lumot bermagan.

Janubiy Koreya va AQSH harbiylari raketalarning aniq xususiyatlarini aniqlash uchun tahlil olib bormoqda. Seul hukumati esa 20 sentyabr kungi uchirishlarni BMT Xavfsizlik kengashi rezolyutsiyalarini buzuvchi “jiddiy harakat” deb baholab, Pxenyanni ballistik raketa sinovlarini darhol to‘xtatishga chaqirgan.

Yaponiya Bosh vaziri idorasi ham shu kuni ikkala uchirilgan ob’ekt ballistik raketa bo‘lishi mumkinligini bildirdi. Tokio Shimoliy Koreyaga “qat’iy norozilik” bildirdi va raketa uchirilishini mintaqadagi tinchlik va xavfsizlikka tahdid sifatida qoraladi.

Eslatib o‘tamiz, avvalroq KXDR BMTning yadro dasturi bo‘yicha rezolyutsiyasiga keskin munosabat bildirgan edi.